Pyo á leið til Tottenham

Suður-Kóreumaðurinn Lee-Young Pyo er á leið til Tottenham Hotspur frá PSV Eindhoven, ef marka má orð forráðamanna félagsins í morgun. Pyo hefur fyrir löngu sagt að hann vildi fara til Lundúnaliðsins, en fram að þessu hefur hollenska liðið ekki viljað láta hann fara. "Það bendir allt til þess að Lee sé á leið til Tottenham, því aðeins á eftir að ganga frá formsatriðum varðandi kaupin," sagði Guus Hiddink, knattspyrnustjóri PSV. Pyo er öskufljótur og duglegur vinstri bakvörður, sem eflaust á eftir að styrkja lið Tottenham og ekki ólíklegt að hann slái hinn sænska Erik Edman út úr byrjunarliðinu.