Leitar að á­huga­manni til að vinna Littler

Verið er að halda úrtökumót þar sem Phil Taylor dæmir um hvort að áhugapílukastarar hafi það sem þarf til þess að reyna að vinna Luke Littler í einum legg. Sá sem getur unnið Littler mun fá hálfa milljón breskra punda í verðlaun sem gerir um 82 milljónir íslenskra króna.

Mótið verður sýnt á Netflix þar sem Phil Taylor er staðráðinn í að finna áhugamann sem getur átt „Rocky Balboa-augnablik“ og unnið Littler í einum legg. Pílukastleggurinn verður frá 501 og fyrstur niður í 0 vinnur.

Phil Taylor er sigursælasti pílukastari allra tíma og varð á sínum tíma heimsmeistari sextán sinnum sem er meira en nokkur annar. Luke Littler er enn einungis 19 ára en er nú þegar kominn með tvo heimsmeistaratitla undir beltið. Hann er því að byrja vel með að ná afrekum Taylor en hann á þó langt í land.

Taylor sér um að skoða pílukastara um allt Bretland til að sjá hverjir gætu haft hæfileikana til þess að vinna Littler. Hann viðurkennir þó að til að vinna Littler þurfi heppnin að vera með áhugamanninum.

„Áhugamaðurinn þarf að eiga sinn besta dag og biðja til guðs að Luke [Littler] eigi slæman legg,“ sagði Taylor við Sky Sports um möguleikana á að áhugamaður vinni Littler.

Mótið verður haldið 30. október og verður sýnt í beinni útsendingu á Netflix. Gary Linneker, fyrrverandi landsliðsmaður Englands í fótbolta, mun sjá um að kynna keppnina fyrir áhorfendum.