Jólin gengin í garð í verslunum Bónus

„Já, þetta er aðeins fyrr en í fyrra,“ segir Björgvin Víkingsson framkvæmdastjóri Bónus en hann segir piparkökur hafa klárast á lager skömmu fyrir jól í fyrra og því hafi það verið í eins konar varnúðarskyni að panta meira og byrja að selja þær fyrr í ár.

„Þannig að við bættum í magn og pöntuðum meira og byrjuðum aðeins fyrr,“ segir hann en bætir við að þau geri sér alveg grein fyrir því að sumum gæti þótt sláandi að sjá piparkökur til sölu svona stuttu eftir sumarlok. Það sé þó þannig að þær rjúki út strax í september.

„Það var mjög góð sala í september í fyrra og ég get staðfest það að það er það sama í ár, þetta rýkur út.“

Björgvin segir útlit fyrir að það verði aftur uppselt fyrir jól með þessu áframhaldi en það sé gríðarlegt magn sem seljist og mikill undirbúningur að baki.

„Við búumst eiginlega við því miðað við söluna núna að, þrátt fyrir að við pöntuðum töluvert meira magn, að þetta gæti klárast aftur fyrir jól,“ segir hann.

Miða við 1. september

En líkt og fyrr segir hafi það verið eftirspurn sem varð til þess að sölunni var flýtt enn meir en síðustu ár.

„Við djókuðum með það hvort við gætum komið þeim upp í hillur í ágúst en það var nú bara meira upp á grínið. Ég held við séum nú ekki að fara að gera þetta fyrr á næsta ári heldur en 1. september,“ segir Björgvin og bætir við: „Ég held að við eigum ekki að láta slag standa þar.“

Auðvitað verði þau vör við viðbrögð en það sé einmitt algengt að fólk annaðhvort trúi ekki eigin augum og þyki fullsnemmt að salan sé hafin í september eða það hoppi hæð sína af gleði enda fjölmargir sem bíða eftir jólahátíðinni frá því að hún klárast á hverju ári og þar til hún gengur í garð á ný.

„Ætli þetta sé ekki svona skrítið samband, annaðhvort elskarðu eða hatar að piparkökurnar séu komnar, en salan sýnir að fólk elskar að piparkökurnar séu komnar. Ég get alveg sagt það,“ segir hann.

Langmesta stuðið um jólin

Það sé ekki hægt að fullyrða annað en að stjórn Bónus sé skipuð jólaunnendum.

„Verðum við ekki öll að vera það? Þetta er langstærsta tímabilið og langmesta stuðið í verslunum,“ segir Björgvin en hann segir fólk mögulega ekki átta sig á því hversu snemma þurfi að panta piparkökurnar svo þær séu fáanlegar tímanlega.

„Ég held að fólk fatti ekki heldur hversu snemma það þarf að panta þessar piparkökur, við erum að tala um fyrir mörgum, mörgum mánuðum síðan.“

Erum við að fara að sjá páskaegg í hillum að morgni til þann 1. janúar?

„Við stefnum ekki á páskaegg 1. janúar,“ sagði Björgvin en bætti loks við að það væri gaman að segja frá því að verðið á piparkökunum væri það sama og síðustu tvö ár, sem þætti ansi gott í keppninni um að halda lágu verði.

„Þannig að þær duttu í búðir fyrr en í fyrra en jafn ódýrar.“