Kalla eftir ákvörðun um milljarðaáform í Skálafelli

Birgir Olgeirsson skrifar 3. september 2026 16:21

Frá vinstri eru Hildur Björnsdóttir borgarstjóri og formaður stjórnar SSH, Björg Magnúsdóttir forseti borgarstjórnar og varaformaður borgarráðs og Einar Þorsteinsson formaður borgarráðs. Fundargerð samstarfsnefndar skíðasvæða höfuðborgarsvæðisins var lögð fyrir borgarráð í dag. Nefndin vill að stjórn SSH ákveði hvort endurskoða eigi samkomulag sveitarfélaganna um uppbyggingu Skálafells. Vilhelm

Framtíð skíðasvæðisins í Skálafelli er á ný komin á borð sveitarfélaganna á höfuðborgarsvæðinu. Stjórn Samtaka sveitarfélaga á höfuðborgarsvæðinu verður beðin um að taka afstöðu til þess hvort endurskoða eigi samkomulag um uppbyggingu svæðisins frá árinu 2018.

Þetta kemur fram í fundargerð samstarfsnefndar skíðasvæða höfuðborgarsvæðisins frá 19. ágúst sem lögð var fyrir borgarráð í dag.

Samstarfsnefndin samþykkti að óska eftir umræðu og formlegri ákvörðun stjórnar SSH um hvort endurskoða eigi samkomulag sveitarfélaganna, þar á meðal framkvæmdaáætlun og fjárhæðir. Engin ákvörðun hefur því verið tekin um að hætta við uppbyggingu Skálafells.

Af fundargerðinni má þó ráða að ólíkar áherslur séu meðal sveitarfélaganna.

Stólalyftan í Skálafelli. Skíðasvæðið hefur verið lokað undanfarin ár og sveitarfélögin þurfa nú að ákveða hvort haldið verði áfram með uppbyggingu þess.JMG

Fulltrúi Seltjarnarness vísaði til þess að kostnaður við fyrirhugaða uppbyggingu í Skálafelli gæti numið nokkrum milljörðum króna og vildi að áformin yrðu tekin til gagngerrar endurskoðunar áður en lengra yrði haldið.

Fulltrúi Mosfellsbæjar lagði aftur á móti áherslu á að staðið yrði við samkomulagið frá 2018 og skíðasvæðið opnað á ný eins fljótt og unnt væri.

Ekki fylgir sundurliðuð kostnaðaráætlun vegna Skálafells fundargerðinni.

Framkvæmdirnar hafa ekki gengið eftir

Sex sveitarfélög undirrituðu árið 2018 samkomulag um endurnýjun skíðasvæðanna í Bláfjöllum og Skálafelli. Þar var meðal annars gert ráð fyrir endurnýjun stólalyftu og snjóframleiðslu í Skálafelli.

Samkvæmt framtíðarsýn skíðasvæðanna átti stólalyftan að koma árið 2023 og snjóframleiðsla að hefjast árið 2025. Hvorugt hefur gengið eftir.

Skíðafólk í Bláfjöllum. Uppbygging skíðasvæðanna þar og í Skálafelli var hluti af sama samkomulagi sveitarfélaganna frá árinu 2018.Vilhelm

Mikil uppbygging hefur átt sér stað í Bláfjöllum en framkvæmdir í Skálafelli hafa setið á hakanum og svæðið verið lokað undanfarin ár. Vísir fjallaði um málið í febrúar 2025, þegar hópurinn Opnum Skálafell sakaði sveitarfélögin um að hlaupast undan gefnum loforðum.

Á fundi samstarfsnefndarinnar í ágúst var jafnframt samþykkt að verja allt að 15 milljónum króna í drenlagnir í Bláfjöllum og allt að tíu milljónum í undirbúning snjóframleiðslu þar.

Málið er nú komið til stjórnar SSH sem þarf að ákveða hvort samkomulagið frá 2018 standi óbreytt eða verði endurskoðað.

Borgarstjórn Reykjavík Skíðasvæði Skíðaíþróttir