Segir styttast í niður­stöður sam­ráðs vegna kjara­samninga

„Við höfum auðvitað verið að vinna með aðilum vinnumarkaðarins frá því mjög snemma í vor af því að það var alltaf ákveðin hætta á að þetta færi með þessum hætti. Við erum núna mjög nálægt því að vera komin með drög að einhverju sameiginlegu. Ég er mjög bjartsýnn á að það geti gengið í gegn og sú vinna heldur áfram,“ sagði Daði Már Kristófersson, fjármála- og efnahagsráðherra, að loknum ríkisstjórnarfundi, inntur eftir því hvernig ríkisstjórnin ætli að bregðast við stöðunni sem nú er komin upp á vinnumarkaði.

Formaður Starfsgreinasambandsin sagði í gær að það væri mjög mikilvægt að allir aðilar vinnumarkaðar og stjórnvöld settust niður og ynnu að lausn og framkvæmdastjóri Samtaka iðnaðarins kallaði eftir þjóðarsátt.

Unnið í eins miklu samráði og hægt er

Skilja mátti á þeim að þeim þætti skorta á frumkvæði stjórnvalda og meira samtal við stjórnvöld. Daði Már kveðst ekki kannast við það.

„Við höfum átt þetta samráð við Alþýðusambandið og Samtök atvinnulífsins. Við höfum auðvitað verið í öðrum samtölum á sama tíma en vinnan hefur verið þar. Við höfum líka kynnt niðurstöðu þeirrar vinnu í þjóðhagsráði þar sem mjög margir aðilar koma að, fleiri stéttarfélög sem og sveitarfélögin. Þannig að þetta hefur verið unnið í eins miklu samráði og mögulegt er.“

Þú segir að þið séuð að fara að koma með einhvers konar aðgerðapakka. Hvenær nákvæmlega?

„Þetta er auðvitað samtal. Við erum auðvitað ekki beinir aðilar að kjarasamningunum en höfum sýnt alveg skýran vilja til þess að styðja við að þeir eða forsendur þeirra geti haldið. Það er raunverulega veltur svolítið á aðilum vinnumarkaðarins hvenær þetta verður kynnt en við munum taka þátt í þeirri vinnu.“

Hið opinbera leiði ekki hækkanir

Borið hefur á því að stjórnvöld séu gagnrýnd fyrir gjaldskrárhækkanir og þeim hefur jafnvel verið kennt um aukningu verðbólgu. Daði Már blæs á slíka gagnrýni.

„Ég vil byrja á því að halda því til haga að gögnin styðja nú ekki að það hafi verið hækkanir opinberra gjalda sem leiða þetta og raunar er það þannig að þau hafa verið algjörlega hlutlaus varðandi verðbólguþróun. En ég tel samt að það sé mjög mikilvægt að allir aðilar axli ábyrgð. Forseti ASÍ hefur ítrekað sagt þetta og ég tek undir með honum að þetta er verkefni sem krefst óvenjulegrar aðkomu og við erum tilbúin í hana.“