Heilsustofnunin í Hvera­gerði fær langtímasamning

Alma D. Möller heilbrigðisráðherra, Sigurður Helgason forstjóri Sjúkratrygginga Íslands, Gunnlaugur K. Jónsson forseti NLFÍ og Þórir Haraldsson forstjóri Heilsustofnunar undirrituðu í dag fjögurra ára þjónustusamning um sérhæfða endurhæfingu segir í tilkynningu á vef Stjórnarráðsins. Hámarksfjárhæð samningsins nemi tæpum einum og hálfum milljarði króna og hann taki gildi 1. janúar næstkomandi. 

Samningurinn marki mikilvægt skref í að efla stöðugleika og fyrirsjáanleika í þjónustu við einstaklinga sem þurfa á endurhæfingu að halda.

„Samningurinn veitir aukinn sveigjanleika til að mæta breytilegri eftirspurn milli meðferðarteyma. Jafnframt er lögð rík áhersla á gæði þjónustunnar, árangursmælingar og áframhaldandi þróun greiðslufyrirkomulags sem styður við skilvirka og árangursríka endurhæfingu,“ segir í tilkynningunni.