Ingólfur kaupir Ís­búð Vestur­bæjar

Í afkomutilkynningu sem Bera birti í dag segir að dótturfélagið Kjarnavörur ehf., sem er allt í eigu Beru, hafi þann 8. júní selt allt hlutafé í Ísbúð Vesturbæjar ehf. til móðurfélags Trölls ferðaþjónustu ehf., en téð móðurfélag nefnist BlágrýtiOI og er í 100 prósenta eigu Ingólfs Ragnars.

Heildarvirði Ísbúðarinnar í viðskiptunum var 215 milljónir króna en kaupin eru háð samþykki Samkeppniseftirlitsins, að því er fram kemur í afkomutilkynningunni fyrir fyrsta ársfjórðung.

Tröll ferðaþjónusta velti 3,2 milljörðum króna árið 2024 en skilaði þó 25 milljóna króna tapi það ár, samkvæmt ársreikningi. Ársreikningur fyrir 2025 hefur ekki verið birtur.

Ísbúðin velti um 582 milljónum króna árið 2024 og skilaði þá 12 milljóna króna hagnaði.

Rúmlega ár er liðið frá því að Ölgerðin keypti Kjarnavörur í febrúar 2025 en þá fylgdi með 100 prósenta eignarhlutur í Ísbúð Vesturbæjar.

Auk Trölls ferðaþjónustu á BlágrýtiOI hundrað prósenta hlut í félögunum Tröll tækjum, Rhýólít, Tröll Vík, Hvalvörðugilslæk ehf., Um Hverfis Jörðina, Hótel Hrífunes, Vík Tröll Hóteli, Drangshlíð Hóteli og Tröllahóteli.

Einnig er greint frá því í tilkynningunni að Kjarnavörur hafi þann 8. maí keypt alla útistandandi hluti í Innbak og eigi nú félagið að fullu, en fyrir áttu Kjarnavörur 68% hlut. Kaupverðið var 89 milljónir króna og var greitt í reiðufé, samkvæmt tilkynningunni.