Lægsta matvöruverðið enn oftast að finna í Prís

Verðmunur á einstökum vörum er víða mikill og í mörgum tilvikum fer hann yfir 30 prósent. Verðmunur er gjarnan minni í lágvöruverslunum eða oft á bilinu fimm til tíu prósent frá lægsta verði. Þetta sýnir ný könnun Verðlagseftirlits ASÍ á matvöruverði.

Í tilkynningu segir að niðurstöðurnar undirstriki að neytendur geti sparað umtalsverðar fjárhæðir með því að bera saman verð milli verslana. Samkvæmt úttektinni er ódýrasta verðið á matvöru að finna í Prís en þar á eftir fylgja Bónus og Krónan.

Þar kemur einnig fram að þegar verð voru borin saman á 289 vörum sem fengust í lágvöruverslunum, þeim Bónus, Krónunni, Nettó og Prís, var lægsta verðið oftast að finna í Prís.

Verð 5,5 prósentum hærra en í Prís

Verslunin væri þannig með lægsta verð á fjölmörgum vörum í öllum helstu vöruflokkum, þar á meðal mjólkurvörum, brauðvörum, kjötvörum, drykkjarvörum og ýmsum þurrvörum. Að jafnaði var verð á vörum í Bónus um 5,5 prósentum hærra en þar sem varan fékkst á lægsta verði, sem í nær öllum tilfellum var í Prís. Verð á vörum í Krónunni var að jafnaði sex prósentum hærra og Nettó um 11 prósentum hærra.

Samkvæmt tilkynningu er tæplega átta þúsund króna verðmunur á vörukörfunni í lágvöruverslunum. Vörukarfa með hundrað algengum neysluvörum var ódýrust í Prís þar sem hún kostaði 60.395 krónur samanborið við 68.127 kr. í Nettó þar sem vörukarfan var dýrust. Í Bónus kostaði sama karfa 64.373 kr. og í Krónunni 64.546 kr. Vörulistann má í heild sinni sjá hér.

Í tilkynningu er tekið fram að vöruúrval geti verið mjög breytilegt á milli verslana og einnig munur á stærð pakkninga. Af þeim vörum sem fáanlegar voru í öllum níu verslununum hafi verið algengt að verðmunur væri á bilinu 25 til 70 prósent. Mest hafi munað á verði á heimilisbrauði frá Myllunni sem var meira en tvöfalt dýrara í Krambúðinni heldur en í Prís.

Hæsta verðið í Krambúðinni

Þá er samkvæmt könnuninni mikill verðmunur á sérvörum og algengum neysluvörum sem finna má á flestum heimilum. Í flestum tilfellum hafi hæsta verðið verið að finna í Krambúðinni og þar á eftir í Hagkaupum. Listann má í heild sinni finna hér.

Á meðal dæma má nefna:

• • MS léttmjólk, 1 lítri, kostaði frá 259 krónum í Prís upp í 369 krónur í Krambúðinni, sem jafngildir 42 prósenta verðmun.
• Nýmjólk var á bilinu 259 til 369 krónur í Krambúðinni, einnig 42 prósenta munur.
• KEA smáskyr var á bilinu 201 til 289 krónur eftir verslunum, eða 44 prósenta munur. Ódýrast var það í Prís en dýrast í Krambúðinni.
• Heimilisjógúrt með jarðarberjabragði kostaði frá 492 krónum í Prís upp í 649 krónur í Krambúðinni, sem er 32 prósenta munur.
• Góðostur í sneiðum kostaði á bilinu 1.105 til 1.399 krónur í Krambúðinni, eða 27 prósenta munur.
• Kjarnafæði Lúxus Lambalæri kostaði frá 2.599 kr/kg í Prís upp í 4.779 kr/kg í Nettó, sem jafngildir 84 prósenta verðmun og rúmlega 2.100 króna mismun á kr/kg.
• Ali brakandi lærakjöt var á bilinu 1.659 til 2.239 krónur, eða 35 prósenta munur. Þá kostuðu kjúklingabringur frá 2.110 kr/kg upp í 2.759 kr/kg eftir verslunum.
• Rauð epli voru ódýrust í Prís á 399 kr/kg en þar á eftir fylgdi Krónan á 413 kr/kg og Bónus á 459 kr/kg.
• Spergilkál kostaði frá 479 krónum upp í 749 krónur, sem er 56 prósenta munur. Lambhagasalat var á bilinu 459 til 799 krónur, eða 74 prósenta munur.
• Verðmunur á sveppum og tómötum var minni, eða 13 og 12 prósent.

Í tilkynningu kemur fram að þótt munurinn á einstaka vörum virðist oft ekki mikill geti hann safnast hratt upp þegar keyptar eru margar vörur í einni innkaupaferð. Könnunin sýni að verðmunur á algengum dagvörum sé enn mikill og að sérstaklega geti borgað sig að fylgjast með verði á kjöti, mjólkurvörum og brauðvörum þar sem munurinn sé gjarnan mikill.

Verðlagseftirlit ASÍ kannaði verð á matvöru dagana 8. til 14. júní í níu verslunum. Verð voru könnuð í Bónus, Krónunni, Nettó, Hagkaupum, Krambúðinni, Kjörbúðinni, Fjarðarkaupum, Prís og SPAR. Nánar hér á vef ASÍ.