Mega ekki aug­lýsa MBA-nám án þess að vera há­skóli

Í tilkynningu þess efnis á vef Neytendastofu segir að Akademias hafi hafnað því að kynningarefni félagsins á Akademias Executive MBA gæti talist villandi og vísað til þess að ekki væri um lögverndað heiti að ræða ásamt því að hvergi komi fram í efni félagsins að Akademias sé háskóli. Ennfremur hafi Akademias bent á að ákvörðun um að fjárfesta í löngu námi sé ekki tekin í skyndi og því um upplýsta kaupákvörðun neytenda að ræða.

Neytendastofa hafi komist að þeirri niðurstöðu að framsetning kynningarefnis Akademias á Akademias Executive MBA og notkun félagsins á heitinu „Executive MBA“ á námi sínu sé villandi gagnvart neytendum. Notkun þess kunni að gefa neytendum ranglega til kynna að um háskólanám sé að ræða sem leiði til háskólaprófs en Akademias sé ekki háskóli í skilningi laga um háskóla.

Neytendastofa hafi því bannað Akademias ehf. að nota heitisins „Executive MBA“, í markaðs- og kynningarefni fyrirtækisins svo villandi sé fyrir neytendur. Upplýsingar um námleiðina „Akademias Executive MBA“ þurfi að vera réttar, viðeigandi og kveða með skýrum hætti á um að ekki sé um háskólanám að ræða sem leiði til háskólaprófs í skilningi laga um háskóla, hvar sem þær birtast neytendum.