Magdeburg aftur á sigurbraut eftir erfiða bikarhelgi

Magdeburg tapaði fyrir Bergischer, 31-30, í undanúrslitum þýsku bikarkeppninnar um síðustu helgi og svo fyrir Lemgo, 35-31, í leiknum um 3. sætið.

Magdeburg hristi af sér vonbrigðin í dag og vann fjögurra marka sigur á Stuttgart sem er um miðja deild. 

Gísli Þorgeir Kristjánsson skoraði fimm mörk fyrir Magdeburg og Ómar Ingi Magnússon eitt. Elvar Örn Jónsson lék ekki með Magdeburg í leiknum í dag.

Albin Lagergren var markahæstur hjá Magdeburg með sex mörk. Liðið er með sjö stiga forskot á Flensburg á toppi deildarinnar.

Bergischer, sem Arnór Þór Gunnarsson þjálfar, laut í lægra haldi fyrir Wetzlar, 33-29. Bergsicher er í 15. sæti deildarinnar með fimmtán stig, þremur stigum frá fallsæti þegar fimm umferðum er ólokið.