Aug­liti til aug­litis í fyrsta sinn frá ís­lömsku byltingunni

Sendinefndir Bandaríkjanna og Íran komu til Islamabad höfuðborgar Pakistans í morgun en Pakistanar hafa verið atkvæðamiklir í friðarumleitunum frá því að Bandaríkjamenn og Ísraelar gerðu árásir á Íran fyrir sex vikum síðan. Shebas Sharif forsætisráðherra Pakistan hafði milligöngu um fundinn.

Samkvæmt umfjöllun breska ríkisútvarpsins hófst samtal fulltrúa ríkjanna á því að skilaboð fóru fram og til baka í gegnum pakistanska milliliði. Skömmu síðar hófst beinn fundur milli sendinefnda Írans og Bandaríkjanna.

Fyrr í vikunni var greint frá því að fallist hefði verið á tillögu um tveggja vikna vopnahlé sem fór hins vegar úr skorðum innan við sólarhring síðar vegna loftárása Ísraels á Líbanon. Pakistanar og Íranar vildu meina að vopnahléð næði einnig til Líbanons en því voru Bandaríkjamenn og Ísraelar ósammála.

Í bandarísku sendinefndinni eru auk J.D. Vance varaforseta Steve Witkoff erindreki og fyrrum fasteignasali og golffélagi Bandaríkjaforseta og Jared Kushner tengdasonur Bandaríkjaforseta.