Segir við­ræður ganga stór­vel en hótar stríðsglæpum

Þetta er meðal þess sem Trump segir í nýrri færslu á Truth Social, hans eigin samfélagsmiðli, en hann hefur áður talað um að stjórnarskipti hafi í raun átt sér stað í Íran. Það kannast þó fáir við og liggur ekki fyrir við hvaða aðila Bandaríkjamenn eru að tala, í gegnum millilið í Pakistan.

Marco Rubio, utanríkisráðherra, var spurður að því í morgun hverja Bandaríkjamenn væru að tala við en neitaði að svara spurningunni. Hann sagði að það myndi setja þá menn í hættu.

Í færslunni segir Trump að verði Hormússund ekki opnað aftur muni Bandaríkjamenn ljúka dvöl sinni í Íran með því að sprengja í loft upp hvert einasta orkuver í landinu, alla olíubrunna, Kharg-eyju (þaðan flytja Íranir um níutíu prósent af olíuafurðum sínum úr landi) og mögulega einnig allar þær stöðvar í Íran þar sem sjó er breytt í drykkjarhæft vatn með eymingu.

Trump sagði að þessir staðir hefðu vísvitandi ekki verið sprengdir enn en þessar árásir yrðu gerðar til að hefna fyrir þá mörgu bandarísku hermenn og aðra sem klerkastjórnin í Íran hefði banað í gegnum árin.

Það að ráðast á borgaralega innviði, eins og Trump er að hóta og hefur ítrekað gert áður, er stríðsglæpur.

Trump hefur ítrekað farið um víðan völl þegar kemur að stríðinu gegn Íran. Hann hefur ítrekað sagt að stríðið sé unnið og að Íranir hafi verið gersigraðir.

Hormússund er gífurlega mikilvægt hafsvæði en um það fer um fimmtungur af allri olíu heimsins og sömuleiðis mikið af jarðgasi.

Siglingar olíu- og gasflutningaskipa um sundið hafa dregist verulega saman frá því árásirnar á Íran hófust.

Lokunin hefur því leitt til mikilla verðhækkana víðsvegar um heiminn og þar á meðal í Bandaríkjunum, þó Bandaríkjamenn séu að mestu leyti sjálfu sér nægir þegar kemur að olíu og jarðgasi. Verðið þar tekur mið af heimsverði, eins og víðast hvar annarsstaðar.

Íranir hafa skotið aragrúa eldflauga og dróna að olíuinnviðum og öðrum borgaralegum skotmörkum í nágrannaríkjum sínum síðan Bandaríkjamenn og Ísraelar hófu árásir á Íran. Í dag gerðu þeir árás á mikilvæga orkuinnviði í Íran og á olíuvinnslu í Ísrael.

Þá hefur Trump sagt að hans draumur væri að ná stjórn á olíuauðlindum Íran.

„Í hreinskilni þá væri ég helst til í að taka olíuna í Íran en heimskt fólk í Bandaríkjunum segir: Af hverju ættirðu að gera það?“ sagði Trump í samtali við Financial Times um helgina. Gaf hann til kynna að til greina kæmi að hernema Kharg-eyju.

Sjá einnig: Enn fer ekki saman hljóð og mynd

Trump er einnig sagður íhuga að senda hermenn inn í Íran til að ná í auðgað úran sem finna má þar. Talið er að Íranir eigi rúm fjögur hundruð kíló af töluvert auðguðu úrani sem tiltölulega auðvelt væri að auðga meira, svo það yrði hægt að nota það í kjarnorkuvopn.

Talið er að þetta úran sé að finna í tveimur af þremur kjarnorkurannsóknarstöðvum sem Ísraelar og Bandaríkjamenn vörpuðu sprengjum á síðasta sumar.

Það að sækja þetta úran yrði flókin og hættuleg aðgerð, samkvæmt sérfræðingum sem ræddu við blaðamenn Wall Street Journal. Hermenn yrðu væntanlega að athafna sig í nokkra daga á jörðu niðri í Íran, ef þeir kæmust þangað yfir höfuð.

Hermenn þyrftu að ná stjórn á svæðinu og verjast gagnárásum Írana á meðan verið væri að leita að úraninu og þá þyrftu þeir einnig að verjast eldflaugum og drónum. Mögulega þyrfti einnig að gera flugvöll á svæðinu til að flytja búnað þangað og úranið á brott, svo eitthvað sé nefnt.