Sex fé­lög pikkföst í sínu sæti en barist um þrjú laus sæti

Sex félög vita í hvaða sætum þau enda sama hvernig fer í kvöld. Við vitum því líka að Grindavík og Njarðvík munu mætast í átta liða úrslitum sama hvernig fer.

Við vitum líka að Valsmenn enda í fjórða sætinu og ÍR-ingar verða í sjöunda sætinu.

Það er aftur á móti ekki ljóst hvaða lið munu bíða Valsmanna og ÍR-inga.

Valsmenn mæta liðinu í fimmta sæti og það getur bæði orðið KR eða Keflavík sem berjast um fimmta sætið. Eins geta ÍR-ingar mætt bæði Tindastól eða Stjörnunni sem berjast um annað sætið.

Keflvíkingar komast upp fyrir KR-inga á betri stöðu í innbyrðis viðureignum takist þeim að ná þeim að stigum og sömu sögu má segja af Stjörnumönnum nái þeir að vinna upp tveggja stiga forskot Stólanna.

Íslandsmeistarar Stjörnunnar eru eina liðið sem gæti mögulega mætt þremur félögum í átta liða úrslitunum eða Keflavik, KR eða ÍR.

Það er mikið undir hjá Ármenningum og Þórsurum sem berjast fyrir sæti sínu í deildinni.

Þórsarar þurfa ekki aðeins að vinna deildarmeistara Grindavíkur á útivelli heldur einnig að treysta á það að fallið lið Skagamanna vinni Ármann. Öll önnur úrslit þýða að Þórsarar falla úr deildinni.

Álftnesingar, sem eru fastir í 9. sæti, gætu bæði endað með jafnmörg stig og Njarðvíkingar, sem fara í úrslitakeppnina sem og að enda með jafnmörg stig og lið sem fellur úr deildinni. Innbyrðis viðureignir sjá hins vegar til þess að Álftanes getur hvorki hækkað sig né lækkað sig í töflunni í kvöld.