Nýr kynja­kvóti FIFA: Öll kvenna­lands­lið verða að hafa kvenþjálfara

Alþjóða knattspyrnusambandið, FIFA, tilkynnti í gær að nú yrði gerð sú krafa að hið minnsta ein kona yrði í þjálfarateymi hvers liðs í kvennamótum sambandsins. Þessi ákvörðun nær einnig til yngri landsliða kvenna sem og til hins nýja HM félagsliða sem fór fram í fyrsta sinn í vetur.

Hjá hverju liði þurfa sem sagt að vera að minnsta kosti tvær konur í starfsliðinu og þar af að lágmarki einn kvenkyns aðal- eða aðstoðarþjálfari.

Íslenska A-landsliðið er nú í undankeppni fyrir HM sem fram fer í Brasilíu sumarið 2027, með Þorstein Halldórsson sem aðalþjálfara og Ólaf Kristjánsson sem aðstoðarþjálfara. Því er ljóst að bæta þyrfti konu í teymið til þess að Ísland mætti spila á HM.

„Ekki nógu margar konur þjálfarar“

Sömuleiðis þarf að tryggja að kona sé í þjálfarateymi yngri landsliða í mótum á vegum FIFA í framtíðinni en þessar breytingar taka gildi á HM U17 og HM U20 landsliða í ár.

„Það eru einfaldlega ekki nógu margar konur þjálfarar í dag,“ sagði Jill Ellis, yfirmaður knattspyrnumála hjá FIFA.

„Við verðum að hraða breytingunum með greiðari leiðum, fjölgun tækifæra og með því að gera konur sýnilegri á hliðarlínunni,“ sagði Ellis.

Vonir standa til þess að breytingarnar muni fjölga kvenþjálfurum hratt en sem dæmi þá voru kvenkyns aðalþjálfarar á HM 2023 aðeins 12 af 32. 

Fyrirmyndirnar eru þó sannarlega til staðar og eru konur núverandi aðalþjálfarar ríkjandi Evrópumeistara Englands og ríkjandi heimsmeistara Spánar – liðanna sem Ísland spilaði við í fyrstu leikjunum í undankeppni HM.