Opna Laufeyjarverslun fyrir tón­leikana

Sena greinir frá þessu í fréttatilkynningu.

Verslunin mun heita Laufeyland og er svokallað „pop-up“ í þeim skilningi að hún verður aðeins opin frá þriðjudeginum 10. til sunnudagsins 15. mars, fram að seinni tónleikum Laufeyjar. Versluninni er lýst í tilkynningunni sem upplifunarrými sem er innblásið af „tónlist, fagurfræði og töfrum Laufeyjar“. 

Á staðnum verður fjölbreytt afþreying í boði alla dagana, þar á meðal lifandi tónlist, Laufeyjarvarningur og gjafaleikir þar sem hægt verður að vinna gullmiða á tónleikana. Nánari dagskrá verslunarinnar verður tilkynnt fljótlega.

Verslunin verður staðsett rétt við Garðinn, nýju mathöllina í Smáralind, en á nokkrum stöðum mathallarinnar verður boðið upp á sérstakt Laufeyjar-Happy Hour milli 15 og 17 alla vikuna.

Tónleikar Laufeyjar fara fram í Kórnum 14. og 15. mars, uppselt er á fyrri tónleikana og fáir miðar eftir á þá seinni.