Valskonur völtuðu yfir Stjörnuna

Sigur Vals var aldrei í hættu í dag. Liðið leiddi nær allan leikinn, náði snemma öruggri forystu og leiddi með sex mörkum þegar að fyrri hálfleikur rann sitt skeið. 

Forystuna létu Valskonur ekki af hendi í seinni hálfleik heldur bættu frekar í og sigldu að lokum heim tíu marka sigri, 30-20. 

Sigurinn sér til þess að Valur er nú eitt á toppi Olís deildar kvenna með tveggja stiga forskot á lið ÍBV þegar að átján umferðir hafa verið leiknar. 

Þórey Anna Ásgeirsdóttir var markahæst í liði Vals í dag með sex mörk og þá var Hafdís Renötudóttir öflug í markinu með fimmtán varða bolta, markvörslu upp á 50 prósent.