Bæði lið í treyju Patta í kvöld

Leikurinn er á milli SR og Fjölnis en Patti, eins og hann var kallaður, hafði spilað fyrir bæði þessi félög. Leikmenn liðanna munu heiðra minningu hans sérstaklega með því að klæðast upphitunartreyjum með nafni Patreks og númerinu hans, 12.

„Hann var efnilegur leikmaður og mjög áhugasamur. Með mikinn metnað fyrir íþróttinni og félagsskapnum. Mikill liðsfélagi og skemmtilegur og líflegur strákur,“ sagði Bjarni Helgason, varaformaður SR, við Sýn í dag.

„Þetta var áfall fyrir félagið rétt eins og fjölskylduna og hokkísamfélagið allt. Þegar svona áföll verða þá standa allir saman. Okkur langaði að minnast Patta og safna fyrir fjölskyldunni í leiðinni,“ sagði Bjarni.

Félagarnir völdu tónlistina

Allur ágóði af miða- og veitingasölu mun renna óskiptur til fjölskyldu Patta, og þá verður glæsilegur kökubasar á leiknum þar sem einnig verður safnað fyrir fjölskylduna.

Leikurinn hefst klukkan 19:45 en áður verður minningarathöfn, mínútu þögn og viðhafnarpökkakast. Bjarni töframaður verður kynnir og spilar tónlist í anda Patreks sem félagar hans úr U18-liði SR völdu.

„Hann byrjaði ferilinn í Fjölni og færði sig svo yfir til SR. Bæði hann og fjölskylda hans eru miklir SR-ingar, mamma hans í stjórn og pabbi hans mjög öflugur sjálfboðaliði,“ sagði Bjarni. Og Patta er sárt saknað af liðsfélögunum:

„Já. Þetta eru erfiðir tímar fyrir þessa krakka og fyrir fjölskyldu hans alla.“

Hreimur og pökkakast

Söngvarinn Hreimur Örn Heimisson syngur í fyrra leikhléi í kvöld, undir myndasýningu af Patta. 

Í seinna leikhléi verður svokallað pökkakast þar sem áhorfendur geta unnið glæsilega vinninga með því að kasta pökki sem næst miðju. Einn pökkur kostar 1.500 krónur og þrír kosta 3.000 krónur, að sjálfsögðu til styrktar fjölskyldu Patreks.

Þá er bent á styrktarreikning fyrir frjáls framlög: 0511-14-077086, kt. 150886-3419.