Náðu ekki körfunum upp og þurftu að fresta leik í Olís-deild karla

Liðin áttu að mætast í mikilvægum leik í fallbaráttu Olís-deildar karla.

Samkvæmt heimildum Vísis varð að fresta leiknum vegna þess að menn náðu ekki körfunum upp í nýja íþróttahúsinu í Skógaseli.

ÍR er bæði með körfubolta- og handboltalið í efstu deild og notar salinn fyrir báðar íþróttir. Körfunum er lyft upp á meðan handboltaæfingar eða handboltaleikir fara fram.

Tæknin er stundum til vandræða en það er ekki oft sem leik í efstu deild er frestað vegna þess að körfuboltakörfur eru fyrir. 

Stefnan er núna samkvæmt upplýsingum íþróttadeildar Vísis að leikurinn fari fram á mánudagskvöldið.