Marka­kóngur á fimmta stórmótinu í röð

Þetta var fimmta stórmótið í röð þar sem Gidsel er markakóngur, þriðja stórmótið í röð þar sem hann er valinn mikilvægasti leikmaðurinn og áttunda stórmótið í röð þar sem hann er annaðhvort valinn besti leikmaður mótsins eða besta hægri skyttan.

Danir hafa unnið fjögur stórmót í röð og eru nú handhafar allra þriggja stóru titlanna. Gidsel er líka handhafi allra stóru verðlaunanna frá þessum mótum, markakóngstitilsions og besti maður mótsins.

Gidsel skoraði 68 mörk á nýloknu Evrópumóti sem var nýtt markamet á einu EM. Hann varð einnig í öðru sæti í stoðsendingum á eftir Gísla Þorgeiri Kristjánssyni. Gidsel gaf 56 stoðsendingar sem þýddi að hann kom alls að 124 mörkum í níu leikjum á mótinu.

Það gera 13,8 mörk í leik og meira en á HM í fyrra þegar hann kom alls að 119 mörkum eða 13,3 að meðaltali í leik.

Gísli sá þó til þess að Gidsel náði ekki að verða stoðsendingahæstur á þriðja stórmótinu í röð.

Gidsel hefur alls tekið þátt í átta stórmótum með danska landsliðinu og unnið verðlaun á þeim öllum, fimm gull, tvö silfur og eitt brons.

Hann hefur alls skorað 441 mark í 67 leikjum og gefið 313 stoðsendingar. Það gera 754 sköpuð mörk á stóra sviðinu. Það magnaða við þessa tölfræði er að Gidsel hefur aðeins skotið 580 sinnum á markið og hann tekur ekki vítaskot. Hann er að spila fyrir utan en er samt með 76 prósent skotnýtingu i þessum 67 leikjum.

Gidsel hefur fimm sinnum verið kosinn besti leikmaðurinn og hann hefur fimm sinnum verið markakóngur.

Það ótrúlegasta við þetta allt saman er að Gidsel er að ná þessu öllu fyrir 27 ára afmælið sitt sem er 8. febrúar næstkomandi. Hans bestu ár sem handboltamaður ættu því að vera eftir enda hefur hann komið að fleiri mörkum á hverju móti síðustu þrjú mót og er því enn að bæta sinn leik.