„Njósnasjeik“ keypti Trump-félag og fékk flögur

Kaupin sem leidd voru af sjeiknum Tahnoon bin Zaeyd Al Nahyan, sem gjarnan er kallaður „njósnasjeikinn“, kostuðu hálfan milljarð dala. Stuttu síðar fengu furstadæmin leyfi til að kaupa háþróaðar tölvuflögur sem Bandaríkjamenn höfðu áður neitað að selja þeim.

Tahnoon er bróðir forseta furstadæmanna, þjóðaröryggisráðgjafi ríkisstjórnarinnar og forstjóri stærsta fjárfestingasjóðs ríkisins. Hálfur milljarður dala samsvarar um 61,3 milljörðum króna.

Í grein Wall Street Journal segir að viðskiptin, sem hafa ekki verið opinberuð áður, séu fordæmalaus í sögu Bandaríkjanna. Hátt settur embættismaður annars ríkis hafi keypt stærðarinnar hlut í félagi verðandi forseta Bandaríkjanna.

Tahnoon hafði um nokkurt skeið reynt að fá leyfi yfirvalda í Bandaríkjunum til að kaupa öflugustu tölvuflögurnar sem ætlaðar eru til reksturs gervigreindar og þróaðar eru í Bandaríkjunum. Það hafði ríkisstjórn Joes Biden, forvera Trumps, ekki samþykkt af ótta við að tæknibúnaðurinn myndi á endanum rata til Kína.

WSJ segir að tengsl gervigreindarfyrirtækisins G42, sem Tahnoon á, við kínversk fyrirtæki eins og Huawei og önnur hafi vakið sérstakar áhyggjur.

Eftir að Trump bar sigur úr býtum gegn Biden í kosningunum 2024 fór Tahnoon nokkrum sinnum á fund Trumps, Steve Witkoffs, sem er vinur Trumps og sérstakur erindreki hans, og annarra embættismanna. Heimildarmenn WSJ segja þá fundi hafa snúist um gervigreind og ýmislegt annað.

Zach Witkoff, sonur Steves, er einn stofnenda og forstjóri rafmyntafyrirtækisins, sem heitir World Liberty Financial. Allir þrír synir Trumps eru einnig skráðir sem stofnendur WLF.

Síðasta vor samþykkti ríkisstjórn Trumps að selja furstadæmunum hálfa milljón af háþróuðustu tölvuflögum Bandaríkjanna á ári hverju. Það dugar til að byggja eitt af stærstu gagnverum heims fyrir gervigreind.

Enginn hagsmunaárekstur samkvæmt talsmönnum

Um miðjan maí, nokkrum vikum áður en tölvuflögusamkomulagið var opinberað, tilkynnti Zach Witkoff að fjárfestingafyrirtækið MGX, sem Tahnoon leiðir, hafi samþykkt að nota rafmynt WLF til að fjárfesta fyrir tvo milljarða dala í rafmyntakauphöllinni Binance. Hann sagði þó aldrei frá því að WLF og MGX væru að stærstum hluta í eigu sömu aðilanna.

Sjá einnig: Breyttur tónn og reiður yfir gagnrýni vegna flugvélagjafarinnar

Talsmenn Hvíta hússins og WLF þvertaka fyrir að Trump hafi með nokkrum hætti komið að rekstri rafmyntafélagsins sem synir hans eiga að hluta og reka eða látið það hafa áhrif á sig. Anna Kelly, ein talskona Hvíta hússins sagði enga hagsmunaárekstra geta átt sér stað vegna málsins, þar sem auður Donalds Trump væri í sérstökum sjóði sem börnin hans stýra.

Washington Post hefur eftir Elizabeth Warren, öldungadeildarþingkonu Demókrataflokksins og æðsta Demókratanum í bankanefnd öldungadeildarinnar, að um hreina og klára spillingu sé að ræða.

Hún kallar eftir því að embættismenn sem komið hafa að málefnum WLF og Steve Witkoff verði kallaðir fyrir nefndina og látnir svara fyrir málið.

Warren segir að þingið þurfi að láta að sér kveða og stöðva „rafmyntarspillingu“ Trumps.