Heiðdís leggur skóna á hilluna

Heiðdís verður þrítug á árinu en hún hóf meistaraflokksferilinn aðeins fjórtán ára gömul með liði Hattar á Egilsstöðum. Hún skipti til Selfoss og steig skrefið upp í efstu deild árið 2015.

Árið 2017 gekk hún svo til liðs við Breiðablik og spilaði í Kópavoginum til 2022, þegar hún hélt út í atvinnumennsku.

Hún var um skeið hjá Benfica í Portúgal en skipti svo til Sviss. Dvölin hjá Basel entist aðeins í rúmt ár og Heiðdís sneri aftur heim, barnshafandi, árið 2024.

Hún endaði ferilinn svo sem Íslands- og bikarmeistari með Breiðablik sumarið 2025 og spilaði samanlagt 22 leiki.

Heiðdís á átján landsleiki að baki fyrir yngri landslið Íslands.

„Erfiðasta ákvörðun sem ég hef tekið en ætla að segja bless… í bili….. því maður veit aldrei“ skrifar Heiðdís í færslu á Instagram.

„Litla ég frá Egilsstöðum hefði verið svo stolt að sjá allt sem ég hef upplifað í gegnum fótboltann. Öll aukavinnan skilaði sér svo sannarlega.

Ég hafði rosalega mikla ástríðu og keppnisskap sem barn og átti mér stóra drauma en aldrei hefði mér dottið í hug að ég myndi vinna alla þessa titla, spila alla þessa stóru leiki í 16 liða úrslitum í Meistaradeildinni og Evrópukeppninni og fara út í atvinnumennsku til tveggja landa.

Fótboltinn hefur verið númer 1, 2 og 3 nánast allt mitt líf. Ég gaf mig alla í þetta, barðist fyrir liðin mín og tók á móti öllum mótlætum með höfuðið hátt og hélt áfram. Ástríðan var það mikil að þetta var allt saman þess virði. Ég geng södd og sátt frá borði og sé ekki eftir neinu. Allt fólkið sem ég hef kynnst og lært af er samt það sem stendur uppúr. - Þjálfarar og sjúkraþjálfarar sem ég lít upp til og mun leita ráða til í framtíðinni og liðsfélagar/vinkonur sem munu fylgja mér í gegnum lífið. Verð alltaf svo þakklát fyrir öll þessi ár. Takk fyrir mig.“