Fær­eysk landsliðskona til liðs við ÍBV

Fridrikka Maria Clementsen hefur skrifað undir samning við ÍBV en hún kemur til liðsins frá HB Tórshavn.

Fridrikka var með ellefu mörk og tíu stoðsendingar í 21 leik á síðasta tímabili en er tilbúin fyrir næsta skref.

Hún náði tvisvar að gefa þrjár stoðsendingar í einum og sama leiknum, gerði það í tveimur 6-0 sigrum í röð.

„Við erum virkilega spennt að bjóða Fridrikku velkomna til Eyja. Hún er 22 ára færeysk landsliðskona sem kemur með dýrmæta reynslu inn í okkar hóp. Koma hennar er mikilvægur liður í því að við getum mætt þeim bestu af fullum krafti á þessu tímabili,“ segir í frétt á miðlum ÍBV.

„Ég er ánægð með að hafa samið við ÍBV. Ég hlakka til að byrja að æfa með liðinu og hefja undirbúning fyrir komandi tímabil,“ sagði Fridrikka María í viðtali í frétt á miðlum ÍBV.

HB Tórshavn endaði í þriðja sæti í úrslitakeppninni.