Kristín Hrefna tekur við sem fram­kvæmda­stjóri Hopp

Í tilkynningu segir að Kristín Hrefna hafi áður starfað fyrir Meniga, Origo og Veitur þar sem hún leiddi vöruþróun og nýsköpun í fjölmörgum vörum og verkefnum.

„Það er heiður að fá að leiða Hopp Reykjavík á næsta vaxtarstig. Frá upphafi hefur Hopp lagt sitt af mörkum í því að bæta samgöngur á höfuðborgarsvæðinu með umhverfisvænum lausnum, fækka bílum í umferðinni og létta á umferðarþunga höfuðborgarsvæðisins. Ég hlakka til að halda þeirri vegferð áfram svo að borgarbúar geti nýtt sér rafskútur, deilibíla og leigubílafarveitu til að komast á milli staða og andað léttar,“ segir Kristín Hrefna í tilkynningu.

Hún segist sjá mikil sóknarfæri í deilibílum og leigubílafarveitu Hopp.

„Það þurfa ekki allar fjölskyldur að reka bíla þegar það er svona auðvelt að hoppa og aðeins greiða fyrir þær mínútur sem þú ert á ferðinni. Tölum nú ekki um þegar bílastæðagjöld eru nú einnig úr sögunni fyrir notendur Hopp,” segir Kristín Hrefna.

Sæunn segir í tilkynningu að það sé mikill fengur að fá Kristínu Hrefnu til liðs við Hopp.

„Hún kemur inn með mikla reynslu úr tæknigeiranum, sterka leiðtogahæfni og dýrmæta þekkingu á stefnumótun og stjórnun. Frá fyrstu stundu hefur verið ljóst að Kristín Hrefna býr yfir miklum krafti, jákvæðni og skýrri sýn sem smellpassar við Hopp-andann. Ég er viss um að metnaður hennar og orka muni leiða félagið farsællega inn í næsta vaxtaskeið,“ segir Sæunn Ósk.

Hopp er íslenskt nýsköpunarfyrirtæki sem starfar nú í yfir 20 löndum og leggur áherslu á að stuðla að bíllausum lífsstíl með sveigjanlegum og vistvænum fararmáta fyrir borgarbúa.