Kalla ráð­herra og for­stjóra Samgöngustofu fyrir samgöngunefnd

Jens Garðar segir gjaldþrot Play mjög alvarlegt. Það missi 400 manns vinnuna og hugur hans sé hjá þeim. Auk þess séu nokkur þúsund manns strandaglópar víðs vegar sem þurfa að finna út úr því hvernig þau koma sér heim eða frá Íslandi.

„Þetta eru mál sem eru núna aðkallandi.“

Jens minnir á að þegar Wow féll hafi verið miklar skuldir við Isavia og aðra. Nú komi í ljós að skuldir Play við Isavia séu síðustu tvo mánuði og því líti út fyrir að það hafi verið gerð einhver bragarbót með tilliti til þess.

Spurning um meiri vöktun

Hann segir nauðsynlegt að umhverfis- og samgöngunefnd fari í saumana á þessu máli og kalli fyrir nefndina ráðherra og forstjóra ýmissa undirstofnanna eins og Samgöngustofu sem hafi með flug að gera til að fara yfir þessi mál og hvað sé hægt að gera betur.

Hann segir menn á einhverjum tímapunkti hljóta að verða uggandi um stöðuna þegar flugfélagið hefur starfsemi 2021 og uppsafnað tap þess sé 27 milljarðar. „Það hlýtur á einhverjum tímapunkti að fara að vekja spurningar um meiri vöktun og annað varðandi félagið og hvort félagið sé að fara í þrot.“

Hann segir að í gær hafi honum þótt sérstakt að ákveðnar flugvélar hafi farið af stað en ekki aðrar. Það sé sérstakt hvernig hafi verið staðið að því.

Eyjólfur Ármannsson innviðaráðherra sagði í gær að þrotið kæmi honum í opna skjöldu og að hann hafi talið að félagið væri gott og tryggt til áramóta. Hann las um gjaldþrotið á Vísi.

Jens segir ýmsar spurningar vakna við þetta þrot en þáttastjórnandi veltir því til dæmis fram hvort að tilgangurinn með þrotinu sé að taka vélarnar til Möltu til að reka flugfélagið þar.

Kom á óvart

Á Alþingi er kjördæmavika í þessari viku en Jens Garðar gerir ráð fyrir því að hægt verði að fá fólk fyrir nefndina strax í næstu viku og segist ekki trúa öðru en að ráðherra og forstjórar taki vel í það. Hann segir gjaldþrot félagsins einnig hafa komið sér í opna skjöldu.

„Við erum öll búin að lesa fréttaflutning af stöðu Play og vangaveltur um hvernig félaginu muni reiða af í framtíðinni, út af uppsöfnuðum halla og hversu lengi hluthafar ætli að setja pening í félagið ef það fer ekki að snúa viðsnúning. Að þetta gerist svona snöggt, já, ég held að mörgu leyti komi það á óvart. En ég held að aðdragandinn og hvernig þetta var gert hefði getað verið með öðrum hætti,“ sérstaklega með tilliti til starfsfólks og farþega sem eru strandaglópar eða voru búnir að bóka flug.