Jökull í Kaleo hitti stjörnur Rauðu djöflanna og spilaði á Old Traf­ford

Um tvö myndbönd er að ræða. Annars vegar ræðir Jökull, sem er mikill stuðningsmaður Manchester United frá því í æsku, við Rio Ferdinand, fyrrverandi leikmann félagsins, sem og núverandi leikmenn. Er þar um að ræða fyrirliðann Bruno Fernandes, Diogo Dalot og einn af nýju leikmönnum liðsins Matheus Cunha sem kom frá Wolves.

Ræða þeir félagarnir sín á milli tengsl fótboltans og tónlistarinnar, hversu miklu máli samspil þessa tveggja listforma skiptir og nefnir Jökull meðal annars hversu mikill áhugi er hér á landi fyrir Manchester United sem og ensku úrvalsdeildinni í heild sinni. 

Það myndband má sjá hér. 

Svo má ætla að Jökull hafi fengið einhvers konar draum uppfylltann er hann fékk að labba inn á Old Trafford, sem jafnan er kallað Leikhús draumanna, og spila lagið Take Me Home, Country Roads sem John Denver gerði eilíft á sínum tíma. 

Lagið er jafnan spilað á Old Trafford í kringum leiki Manchester United með breyttum texta og undir heitinum Take Me Home, United Road. Hlusta má á flutning Jökuls hér.

Manchester United tekur á móti Arsenal í stórleik fyrstu umferðar ensku úrvalsdeildarinnar á Old Trafford á morgun. Leikurinn verður sýndur í beinni útsendingu á Sýn Sport.