Slysið á sama stað og við sömu að­stæður og fyrri bana­slys í fjörunni

Stúlkan sem lést við Reynisfjöru í gær var níu ára gömul og frá Þýskalandi. Faðir hennar og systir sem einnig lentu í sjónum komust aftur í land en stúlkan sem lést fannst í vatninu um tveimur klukkustundum eftir að hún hafnaði í sjónum.

„Við erum náttúrlega bara miður okkar og hugur okkar er hjá fjölskyldu þessarar stúlku,“ segir Íris Guðnadóttir sem er meðal landeigenda í Reynisfjöru. „Þetta er afskaplega þungt og erfitt og eins og ég segi þá hugsum við til þessarar fjölskyldu í dag.“

Gult ljós í gær

Banaslysið í gær er það fyrsta síðan auknar öryggisráðstafanir voru gerðar á svæðinu í framhaldi af banaslysum í fjörunni fyrir þremur og fjórum árum síðan. Þá var meðal annars aukið við upplýsingagjöf og merkingar, settar upp öryggismyndavélar og ljósaskilti sem gefur til kynna hverjar aðstæður eru hverju sinni með tilliti til ölduhæðar, og hversu langt niður í fjöruna er óhætt að fara.

Í gær var ljósið gult, sem merkir að fólki er ráðlagt að fara ekki lengra en gula línan sem sjá má á myndinni hér að ofan. Skilti sem sýnir þetta svæði fauk í óveðri fyrir nokkru síðan en að sögn Írisar er uppsetning nýs skiltis í vinnslu. Þá sé fjöldinn allur af öðrum merkingum á svæðinu.

„Aðstæðurnar í gær voru eins og þær voru þegar slysin áttu sér stað 2021 og 2022 og það er í rauninni hættulegi staðurinn í Reynisfjöru er við stuðlabergið, þegar sjórinn er að berja á stuðlaberginu og þarna er sá staður sem að myndast þetta frásog. Þannig ef þú lendir þarna úti í sjó þá eru í rauninni afskaplega litlar líkur á að þú komist aftur í land,“ segir Íris.

Hugsanlegt næsta skref að hafa mannaða gæslu á svæðinu

Þrátt fyrir merkingar og viðvaranir segir Íris erfitt að koma í veg fyrir að fólk fari lengra en ráðlagt er. Einkum þegar einn fer af stað eigi aðrir það til að fylgja á eftir. „Þegar fólk byrjar að fara, það sætir færis og hleypur fyrir jafnvel og reynir að komast inn í helli sem er þarna, Hálsnefshellir,“ segir Íris.

Hver getur borið einhvers konar ábyrgð þegar eitthvað slæmt gerist?

„Það er öllum heimil ferð um strandir landsins og fólk ber ábyrgð á sjálfu sér, það er í rauninni ekkert annað um það að segja,“ segir Íris.

Fulltrúar landeigenda munu funda með lögreglu og fulltrúum ferðaþjónustunnar á þriðjudaginn þar sem farið verður yfir hvað mögulega sé hægt að gera betur. „Við erum alltaf að reyna að bæta okkur,“ segir Íris. „Þarna eru merkingar, það er kannski hægt að uppfæra þær og jafnvel uppfæra eða lækka hættustuðulinn þannig að það komi oftar rautt ljós. Þannig við munum klárlega tala saman og reyna að finna fleiri lausnir. Svo er næsta skref, það væri þá bara einhver mönnuð gæsla á staðnum en það er þá spurning hvernig það væri unnið.“

Vildi geta lokað við fjörukambinn

Spurð hvort það komi til álita af hálfu landeigenda að hreinlega loka aðgangi að fjörunni svarar Íris með því að benda á að uppi á fjörukambinum, þar sem útbúinn hefur verið útsýnispallur, sé hægt að virða fyrir sér fjöruna og landslagið frá öruggum stað.

„Ef þú ert uppi á fjörukambinum þá ertu óhultur. Ég persónulega myndi vilja geta lokað bara á fjörukambinum. Þá er spurning, getum við nýtt okkur spákerfið, getum við nýtt okkur söguna sem við eigum í löggæslumyndunum og svoleiðis. Og ef að spáin segir okkur eitthvað getum við þá lokað fyrir, sett einhvern borða á fjörukambinn. En svo er annað mál, að það er afskaplega erfitt að stýra fólki,“ segir Íris.

„Við höfum svo sem reynslu af því. Ég sjálf þegar ég kem þarna niður eftir þá reyni ég að vara fólk við ef ég sé að fólk er að fara sér að voða eða eitthvað slíkt og það er bara afskaplega erfitt að fá fólk til að hlusta.“