KR lætur þjálfara­t­eymið fjúka

Gunnar og Ívar stýrðu KR upp úr 2. deildinni á síðustu leiktíð og liðið því nýliði í Lengjudeild kvenna í ár. Þegar 12 umferðir af 18 eru búnar er liðið í 5. sæti með 19 stig með markatöluna 27-29. Liðið er sex stigum frá HK í 2. sætinu sem og sex stigum frá Haukum í 8. sætinu.

Knattspyrnudeild KR greinir frá því í kvöld, mánudag, að þeir Gunnar og Ívar hafi verið látnir taka poka sinn.

„Stjórn knattspyrnudeildar KR hefur tekið ákvörðun um að gera breytingar á þjálfarateymi meistaraflokks kvenna,“ segir í yfirlýsingunni.

Þá er fráfarandi þjálfurum þakkað fyrir „samstarfið og þeirra framlag til uppbyggingar kvennaknattspyrnunnar í KR.“

Að endingu kemur fram að Jamie Brassington, markvarðarþjálfari bæði meistaraflokks karla og kvenna, muni stýra liðinu út leiktíðina. Það verður þó að sama skapi tilkynnt um ráðningu nýs þjálfara á næstunni.

Næsti leikur KR er útileikur gegn Fylki þann 7. ágúst næstkomandi.