Tók fjóra daga þegar hún var tíu ára en getur nú unnið fimmta árið í röð

Hlaupadrottningin Andrea Kolbeinsdóttir verður meðal keppenda og mun reyna að verja titilinn sem hún hefur unnið undanfarin fjögur ár.

Andrea mun örugglega góða keppni frá sterkum hlaupurum líkt og Írisi Önnu Skúladóttur og Halldóru Huld Ingvadóttur sem hafa náð góðum árangri í hlaupinu síðastliðin ár.

Andrea hitaði aðeins upp fyrir hlaupið með skemmtilegri færslu á samfélagsmiðlum þar sem hún fór aðeins yfir sögu sína á Laugaveginum.

„Ég held Laugavegshlaupið verði alltaf uppáhalds. Hlakka til að sjá hver tíminn minn verður á morgun,“ skrifaði Andrea.

Hún fór Laugaveginn fyrst tíu ára gömul á fjórum dögum en metið hennar er síðan 2023 þegar hún fór hann á aðeins fjórum klukkutímum og 22 sekúndum. Hún kom í mark á fjórum klukkutímum og 33 mínútum í fyrra.

Undanfarin fjögur ár hefur hún alltaf klárað á innan við fimm klukkutímum.

Það verður gaman að sjá hvort Andreu takist að vinna fimmta árið í röð og hvort að hún ógni eitthvað metinu sínu.

Laugavegshlaupið verður í beinni útsendingu á Vísi og sjónvarpsstöðinni Vísi en útsending hefst upp úr hádegi. 

Í ár verður um sannkallað methlaup að ræða. Yfir 800 keppendur eru skráðir til leiks, en það er fleiri en nokkru sinni fyrr og úrval sterkustu utanvegahlaupara landsins mætir til að etja kappi á þessari sígildu leið.