„Það er orrustan um Ís­land“

Bandarískur kjarnorkuknúinn kafbátur kom til hafnar á Grundartanga í dag í þjónustuheimsókn. Þorgerður Katrín Gunnarsdóttir, utanríkisráðherra, var viðstödd heimsóknina en kom seint vegna látanna á Alþingi í morgun. Fréttastofa náði tali af Þorgerði til að ræða um stöðu þingsins.

Hvernig blasa þessar nýjustu vendingar við þér?

„Þetta eru algjörlega fordæmalausir tímar í þinginu, það er algjörlega þannig. Það er mjög mikilvægt að við gætum að því að málfrelsi þingmanna sé virt og það fúnkeri. En málfrelsi þingmanna má ekki nota til þess að stoppa mál, stoppa lýðræði, stoppa þingræði,“ segir Þorgerður.

„Það er verið að ganga gegn stjórnarskrárbundnum rétti þingmanna, ég er ekki að fá að kjósa um þau mál sem hafa hlotið mikla umræðu. Það er búið að slá Íslandsmet um veiðigjöldin, það mál hefur fengið gríðarmikla umræðu, umfjöllun og skoðun. Það er búið að fara í gegnum allan ferilinn og það er kominn tími að við getum fengið tækifæri til þess að kjósa um það. Það er verið að koma í veg fyrir það,“ segir hún.

Þorgerður segir Hildi Sverrisdóttur, þingflokksformann Sjálfstæðisflokksins og 5. varaforseta, víst hafa slitið þinginu fyrirvaralaust án samráðs við forseta þegar lá fyrir að þingfundur ætti að halda áfram.

„Það vissu allir að við ætluðum að halda áfram inn í nóttina. Það er verið að beita öllum brögðum til þess að þingræðið fúnkeri ekki og ég er miður mín yfir þessu,“ segir hún.

Fordæmalaus framkoma minnihlutans

„Ég hef ekki upplifað svona framkomu af neinni stjórnarandstöðu í gegnum tíðina og hef þó upplifað margt,“ segir Þorgerður Katrín um minnihlutann.

Þessi ræða forsætisráðherra í morgun, er þetta að einhverju leyti merki um að þið séuð að undirbúa að beita þessu ákvæði um að fara í atkvæðagreiðslu um veiðigjaldafrumvarpið?

„Það er allavega ljóst að skilaboð okkar eru skýr, við ætlum að láta lýðræðið fúnkera og við ætlum að standa vörð um þingræðið. Við viljum að það verði greidd atkvæði um veiðigjöldin. Við erum búin að vera að bjóða stjórnarandstöðunni upp á alls konar hluti, við höfum ekki verið að fara út með það,“ segir hún.

Stjórnarandstaðan sé hins vegar búin að sýna á spilin.

„Þau hafa viljað slátra flestöllum málum okkar en við máttum náðarsamlegast flytja þeirra mál um veiðigjöld sem við vitum að er samið annars staðar út í bæ eða hjá SFS. Það gengur ekki að sérhagsmunaöflin stýri landinu, það er ríkisstjórn í landinu með dyggan meirihluta þingsins á bak við sig og það er hún sem ætlar að stýra hér för,“ segir hún.

Ætla að vinna orrustuna um Ísland

„Eftir þessa uppákomu í gær og hafandi horft á það hvernig stjórnarandstaðan er að haga sér finnst mér við vera komin svolítið í að það er orrustan um Ísland,“ segir Þorgerður.

„Og við ætlum að vinna þá orrustu fyrir almenning og þjóðina alla.“

Núna í fjölmiðlum undanfarið hefur þetta verið friðsamlegt. Slær við nýjan tón núna, er komin meiri harka í þetta?

„Ég verð að segja eins og er að það er skrítið að sitja á fundum með formönnum stjórnarandstöðunnar og það er alltaf verið að lýsa yfir einhverjum samningsvilja. En það er alltaf bara þeirra mál og þeirra leið sem er til umræðu. Greiðum atkvæði! Þau geta verið á rauða takkanum, kannski eru þau smeyk við það,“ sagði hún.

„Leyfum okkur að kjósa. Það er lýðræðislegur réttur okkar þingmanna og til þess erum við kosin að taka afstöðu til mála. Menn eiga ekki að vera hræddir við það.“

„En það er líka furðulegt að upplifa það að við erum ekkert endilega bara að semja við stjórnarandstöðuna. Þau fara með okkar tillögur og eru frekar jákvæð, næstum því búin að ná samningum. Svo koma þau til baka og segja: ,Nei, við getum ekki samþykkt þetta',“ segir Þorgerður.

„Það er alveg augljóst að það eru aðilar út í bæ sem stýra þessu, ekki stjórnarandstaðan.“