Teflt í skjóli móbergsveggja í Laugar­vatns­hellum

Laugarvatnshellar eru jú ekki síður sögulegir en fallegir en þar var búið fram til ársins 1922.

Fram kemur í tilkynningu frá skipuleggjendum mótsins að einstök stemning hafi myndast þegar keppendur léku sína fyrstu leiki í undir móbergsveggjunum. Tefldar voru sjö umferðir með þriggja mínútna tímamörkum með tveggja sekúndna viðbót á leik.

Helgi Kjartansson, oddviti Bláskógabyggðar, lék fyrsta leik mótsins fyrir nýkrýndan Íslandsmeistara Vigni Vatnar og hófst þá baráttan af fullum krafti. Þrátt fyrir ausandi rigningu hélt hellirinn keppendum og gestum tiltölulega þurrum og stemningin minnti fremur á hátíð en hefðbundið skákmót að sögn skipuleggjenda. Áhorfendur dreif að víða úr sveitinni til að fylgjast með.

Það var enginn annar er Vignir Vatnar Stefánsson sem sigraði mótið með 6,5 vinningum af sjö mögulegum. Í öðru sæti varð Arnar Milutin Heiðarsson með sex vinninga og í þriðja sæti Ingvar Þór Jóhannesson með 5,5 vinninga.

Magnús Matthíasson náði stórkostlegum árangri og hlaut verðlaun fyrir besta árangur í flokki keppenda með minna en tvö þúsund stig. Hann vann fimm vinninga. Mikael Bjarki Heiðarsson, einnig með fimm vinninga, var efstur í aldursflokki sextán ára og yngri. Í flokki óstigaskráðra vann Katrín Ósk Tómasdóttir með tvo vinninga en hún æfir hjá Skákdeild Hauka og er aðeins tíu ára gömul.

Að móti loknu bauð heilsulindin Fontana öllum keppendum í slökun. Þar vakti sérstaklega athygli sundskýla með taflborðsmynstri sem naut greinilega mikilla vinsælda meðal keppenda, að sögn skipuleggjenda.