Húsið selt á 78 milljónir og Jakub þarf að reiða fram milljón

Húsið varð landsþekkt yfir nótt í júní í fyrra þegar greint var frá því að hús Jakubs Polkowski, sem er öryrki og fatlaður eftir læknamistök, hafi verið selt á nauðungaruppboði fyrir aðeins brot af markaðsvirði, eða á þrjár milljónir króna, vegna vanskila Jakubs á gjöldum.

Vissi ekki að hann þyrfti að borga gjöldin

Jakub sagðist þá ekki hafa vitað að hann stæði í skuld vegna þeirra gjalda. Svo fór að útburðinum var frestað um rúman mánuð en Jakub og fjölskylda fluttu í félagslegt húsnæði á vegum Reykjanesbæjar ágúst í fyrra.

Kaupandi hússins var útgerðarstjóri úr Sandgerði, sem var eindregið hvattur til þess að draga kaupin til baka. Hann sagðist í samtali við fréttastofu á sínum tíma ekki hafa gert neitt rangt, hann hafi einfaldlega mætt á uppboð líkt og hann hafi margoft áður gert.

Hann sagðist hafa gert allskonar kaup á uppboðum í gegnum tíðina og sagðist meðal annars hafa keypt sér bát á góðu verði skömmu áður.

Greint var frá því í fyrra að húsið hefði verið sett á sölu og uppsett verð væri 82 milljónir króna. Samkvæmt afsali sem gefið var út í maí greiddu nýir eigendur hússins 78 milljónir króna fyrir það. Það gerir 75 milljóna króna söluhagnað. Fasteignasali sem annaðist söluna sagði þó í samtali við Vísi að ráðist hefði verið í talsverðar endurbætur á húsinu áður en það var sett á sölu.

Höfðaði mál en það kostar rúma milljón

ÖBÍ réttindasamtök ákváðu skömmu eftir að málið kom upp að höfða mál á hendur kaupanda hússins og íslenska ríkinu. Það gerði Jakob sömuleiðis en hann stefndi kaupandanum, ríkinu og Reykjanesbæ í febrúar þessa árs til greiðslu 59 milljóna króna.

Sæstjarnan gerði kröfu um að Jakub legði fram 1,45 milljónir króna í málskostnaðartryggingu. Í úrskurði Héraðsdóms Reykjaness varðandi kröfuna segir að Sæstjarnan hafi reist kröfu sína á því að Jakub væri ekki borgunarmaður fyrir málskostnaði þeim sem hann kynni að verða dæmdur til að greiða vegna málarekstursins. Til að mynda hefði árangurslaust fjárnám verið gert hjá honum í þrígang.

„Stefnandi sé öryrki sem búi í félagslegu húsnæði á vegum Reykjanesbæjar og hafi í þrígang verið dæmdur til refsingar í málum er varða fíkniefnabrot, vopnalagabrot og brot gegn valdstjórninni.“

Héraðsdómur félls á kröfur Sæstjörnunnar að mestu leyti og gerði Jakubi að reiða fram 1,1 milljón króna í málskostnaðartryggingu. Landsréttur staðfesti úrskurð héraðsdóms og í dag birti Hæstiréttur ákvörðun sína um að hafna kæruleyfisumsókn Jakubs. Hann þarf því að leggja fram 1,1 milljón vilji hann halda málarekstrinum áfram.