Alexander Máni seldur til Midtjylland

Alexander skaust fram á sjónarsviðið fyrir rétt rúmu ári þegar hann varð þriðji yngsti leikmaður í sögu efstu deildar, eftir að hafa kom inn á gegn KA aðeins 14 ára og 343 daga gamall. Fljótlega eftir það skrifaði hann undir fyrsta samninginn hjá Stjörnunni.

Alexander hefur farið út á reynslu til nokkurra erlendra liða, meðal annars til Benfica í Portúgal og FC Kaupmannahafnar í Danmörku. Ásamt Midtjylland, sem hefur nú fest kaup.

„Alexander er einn af okkar efnilegu leikmönnum og hefur alla burði til þess að ná lengra. Danirnir eru svo sannarlega að næla sér í bæði frábæran leikmann og karakter og hlökkum við mikið til þess að fylgjast með honum frá Íslandi. Við óskum okkar manni góðs gengis í nýrri áskorun” segir í tilkynningu Stjörnunnar.

“Ég vil þakka öllum hjá Stjörnunni fyrir ómetanlegan tíma og stuðning síðustu ár.

Frá því ég steig mín fyrstu skref með félaginu hef ég fengið að þróast sem leikmaður og manneskja – umkringdur frábærum þjálfurum, liðsfélögum og fólki sem hefur alltaf trúað á mig. Nú tekur við nýr kafli. Takk fyrir mig.” segir Alexander Máni um vistaskiptin.

Alexander er sonur Guðjóns Baldvinssonar, Stjörnugoðsagnar sem vann bronsskóinn þegar hann skoraði tólf deildarmörk fyrir Stjörnuna tímabilið 2017 og átti stóran þátt í fyrsta bikarmeistaratitli félagsins árið 2018.