Á­hlaup ICE og ó­vissan veldur vand­ræðum

Ákveðin ró myndaðist á þessum sviðum en það varði þó ekki lengi.

Í gær (miðvikudag) var því svo lýst yfir að engir sérstakir staðir eða geirar yrðu öruggir fyrir fólk sem er í Bandaríkjunum ólöglega.

Forsvarsmenn hagsmunaaðila fyrirtækja í umræddum geirum segja ástandið óviðunandi. Ekki sé hægt að reka fyrirtæki við aðstæður sem þessar, þar sem stefnur stjórnvalda breytast svo oft.

Einn slíkur forsvarsmaður sagði í samtali við AP fréttaveituna að óttinn hafi aftur stungið upp kollinum. Fjölmargir starfsmenn séu í áfalli.

Skipaði leiðtogum ICE að fimmfalda handtökur

Eins og frægt er hefur Trump heitið því að vísa milljónum manna sem halda ólöglega til í Bandaríkjunum úr landi. Sérstök áhersla var lögð á fólk sem brýtur af sér í Bandaríkjunum en brottvísanir hafa þó ekki verið mjög margar, í sögulegu samhengi. Það hefur að miklu leyti verið rakið til þess að sífellt færri hafa reynt að komast ólöglega yfir landamæri Bandaríkjanna og Mexíkó síðan Trump tók við embætti og meinaði fólki að koma að landamærunum og sækja um hæli.

Landamærunum hefur svo gott sem verið lokað. Tölfræði um handtökur og brottvísanir hefur því ekki litið nægilega vel út, meðal Trump-liða.

Stephen Miller, einn nánasti ráðgjafi Trumps, fór á dögunum á fund yfirmanna ICE og er hann sagður hafa húðskammað þá vegna tölfræðinnar og krafið þá um fleiri handtökur. Hann setti þeim það markmið að ná þrjú þúsund handtökum á dag en fyrstu fimm mánuði seinni valdatíðar Trumps var meðaltalið um 650 handtökur á dag.

Miller sagði leiðtogum ICE að hætta að einblína á glæpamenn og byrja að handtaka alla sem eru í Bandaríkjunum ólöglega, jafnvel þó þeir hafi aldrei brotið af sér. Sérstök áhersla hefur verið lögð á borgir þar sem Demókratar halda í stjórnartaumana.

Hrætt fólk mætir ekki til vinnu

Eftir þennan fundhafa grímuklæddir útsendarar ICE verið sýnilegir víða um Bandaríkin í leit að farand- og flóttafólki til að handtaka. Útsendarar ICE hafa einnig setið fyrir fólki í dómshúsum, þar sem farandfólk hefur verið skipað að mæta í dómsal vegna hælisumsókna þeirra.

Þeir mættu á bóndabæi þar sem þeir handtóku allt að helming starfsfólks. Einnig hafa þeir gert áhlaup á verksmiðjur, hótel og veitingastaði. Í einu tilfelli fækkaði starfsmönnum mjólkurbýlis í Nýju Mexíkó úr 55 í tuttugu eftir áhlaup ICE.

Í einum aldingarði í Washingtonríki þar sem yfirleitt eru ráðnir um 150 farandverkamenn til að týna ávexti, fengust einungis tuttugu til að vinna. Það er þrátt fyrir að útsendarar ICE hafi ekki verið á svæðinu, heldur hafi orðrómur um þá verið á kreiki.

Þetta ástand hefur haft mikil áhrif á fólk af latneskum uppruna í Bandaríkjunum, hvort sem þau eru í Bandaríkjunum ólöglega eða ekki. Margir óttast að enda í höndum ICE og vera vísað úr landi án dóms og laga, sem vitað er að hefur gerst.

Einn veitingamaður í Los Angeles sagði í samtali við blaðamann AP að fólk væri of hrætt til að mæta í vinnuna. Mörgum fyndist aðgerðir ICE eingöngu snúast um húðlit fólks.