Hár orkukostnaður er á­hyggju­efni hjá at­vinnu­lífinu

Hluti af starfsfólki Samtaka atvinnulífsins eru nú á hringferð um landið til að taka púlsinn á stöðu atvinnulífsins, auk þess að vera með stutt og hnitmiðuð erindi á fundum á hverjum stað. Sérstök áhersla er lögð á umræðu um öflugan útflutning á fundunum.

Sigríður Margrét Oddsdóttir er framkvæmdastjóri Samtaka atvinnulífsins.

„Við erum í rauninni að hefja nýtt starfsár hjá okkur og allt næsta starfsár ætlum við að vera að ræða um mikilvægi útflutnings fyrir okkur, sem búum hér á Íslandi og ræða líka um tækifærin í tengslum við það,” segir Sigríður.

Sigríður segir algjörlega ómetanlegt fyrir staðarfólk Samtaka atvinnulífsins, sem situr við skrifborðin sín meira og minna í Borgartúni 35 í Reykjavík alla daga að geta farið um landið og tekið góða vinnufundi með atvinnulífinu, auk þess að heimsækja fyrirtæki á stöðunum.

En hver hafa verið helstu áherslumálin á þeim fundum, sem búnir eru ?

„Það sem ég myndi segja að væri rauði þráðurinn og við höfum auðvitað vitað er að undanfarin ár þá hefur okkur ekki tekist að í rauninni aflað nægrar grænnar hagkvæmrar orku þannig að við heyrum það að orkukostnaður og orkudreifing og svona fyrirséður orkuskortur það er eitthvað sem háir fyrirtækjum,” segir Sigríður.

Alls er um níu fundu að ræða á hringferðinni, sem standa yfir allan júnímánuð.

Heimasíða Samtaka atvinnulífsins