Búinn að af­nema regluverkið sem tafði fyrir opnun Kastrup

Veitingamenn í Reykjavík hafa að undanförnu kvartað undan seinagangi við leyfisveitingar vegna reglugerðar um hollustuhætti sem tók í gildi fyrrasumar en fór ekki í framkvæmd hjá Heilbrigðiseftirliti Reykjavíkur fyrr en í maí. 

Tafði fyrir opnun Kastrup

Reglugerðin var sett af síðustu ríkisstjórn en hún fólst í því að hvert einasta starfsleyfi, þyrfti að auglýsa á vef heilbrigðiseftirlitsins í fjórar vikur áður en leyfi væri veitt.  Hver sem er gæti því sent inn kvörtun við leyfisveitinguna og þá hafi eftirlitið fjórar vikur til að vinna úr þeim. Að þeim tíma liðnum gætu veitingamenn svo þurft að bíða í allt að fjórar vikur eftir að endanleg ákvörðun verði  tekin. 

Regluverkið hefur sett alþjóðakaffirisanum Starbucks stólinn fyrir dyrnar þrátt fyrir að hann ætlaði að opna í húsnæði þar sem þegar var kaffihús. Keðjan ætlaði að opna dyr sínar hér á landi í maí en því hefur verið frestað fram í lok sumars, eins og Morgunblaðið greindi frá í dag. 

Nýir rekstraraðilar veitingahússins Kastrup við Hverfisgötu ráku sig á sama vegg þegar þeir hyggðust opna staðinn á ný. Þá hefur bakaríið Hygge, sem hygðist opna þar sem Nebraska stóð áður, einnig mætt miklum töfum.

Umhverfisráðherra segir að regluverkið sem tefur fyrir opnun Kastrup hafi þegar verið afnumið, en breytingin hafi ekki gengið í gegn fyrr en í síðustu viku.

„Þegar það er nýr starfsleyfishafi að taka við starfsleyfisskyldum rekstri, sem heyrir undir þessa reglugerð enda eru engar raunverulegar breytingar að verða á starfsskilunum sjálfum, þá er ekki lengur krafa um að útgefandi leyfisins auglýsi drög að starfsleyfi,“ segir Jóhann Páll Jóhansson, umhverfis orku- og lofstslagsráðherra í samtali við fréttastofu.

Önnur reglugerð varðar Starbucks

Þá eru fleiri breytingar í farvatninu, að sögn ráðherrans. 

„Svo erum við vinna að enn stærri breytingum sem felst í því að starfsemi sé skráningarskyld frekar en starfsleyfisskyld,“ bætir ráðherrann við en þar er um að ræða regluverkið sem hefur tafið fyrir opnun Starbucks.

„Það myndi þýða að fyrirtæki þurfi bara að skila inn nauðsynlegum gögnum, heilbrigðiseftirlitið farið yfir þau og um leið og það er staðfest að gögnin séu fullnægjandi þá getur viðkomandi aðili hafið starsfemi án þess að það komi til auglýsingar og auglýsingarfrests.“ 

Einnig sé til skoðunar hjá ráðuneytinu og umhverfis- og orkustofnun hvort styðja megi betur við eftirlitssvæðin þegar komi að leyfisveitingum, t.d. gefa út leiðbeiningar í von um að auka hraða málsmeðferðar.

„Ríkisstjórnin leggur áherslu á þetta, að létta undir með fólki og fyrirtæki í rekstri og setja ekki íþyngjandi reglur að óþörfu,“ segir ráðherrann.

Fréttin hefur verið leiðrétt. Í fyrri frétt kom fram að regluverkið sem var afnumið hefði valdið töfum hjá Starbucks en það var rangt. Rétt er að það hafi valdið töfum hjá Kastrup, en regluverk sem ráðherra hyggst breyta varðar aftur á móti Starbucks.