Fresta upp­byggingu verkmenntaskóla: „Þessi ó­vissa er niður fyrir allar hellur“

Stefán Vagn Stefánsson, þingmaður Framsóknarflokksins, vakti athygli á málið á Alþingi fyrr í vikunni. Hann segir að hefja átti uppbyggingu fjögurra framhaldsskóla á landinu á þessu ári en svo verði ekki. Umræddir framhaldsskólar eru Menntaskólinn á Ísafirði, Verkmenntaskólinn á Akureyri, Fjölbrautaskóli Norðurlands vestra og Fjölbrautaskóli Suðurnesja.

„Búið var að ná samkomulagi við sveitarfélögin um þeirra hluta, fjörutíu prósent, og komið fjármagn til þess að fara af stað ríkismegin með sextíu prósent hluta og verkefnin voru komin af stað í stjórnsýslunni,“ segir Stefán.

Hann segir einnig að verkefninu hefði verið slaufað án aðkomu fulltrúa sveitarfélaganna og skólanna.

Að sögn Heimis Más Pétursson, framkvæmdastjóri Flokks fólksins, í svari við fyrirspurn fréttastofu hefur málinu ekki verið slaufað heldur fjárheimildinni hliðrað.

„Þar sem ljóst væri að ekkert verkefnanna gæti hafist á þessu ári, hafi 300 milljónum sem fara hafi átt í uppbygginguna á þessu ári verið hliðrað til næsta árs, það er 2026. Fjárheimildirnar eru því ekki felldar niður heldur færðar til næsta árs,“ segir Heimir Már.

Þá segir Eydís Ásbjörnsdóttir, þingmaður Samfylkingarinnar, í aðsendri grein á Vísi að engu hafi verið slaufað heldur fjárheimildum hliðrað „af þeirri ástæðu að fyrirhugaðar framkvæmdir eru ekki komnar á það stig að unnt sé að ráðstafa því fjármagni til verkefnanna, sem áður hafði verið ráðgert að setja í verkin strax á þessu ári.“

Fulltrúar sveitarfélaga komi af fjöllum

Heimir Már sagði einnig að barna- og menntamálaráðuneytið ætti nú í viðræðum við sveitarfélög um hvernig staðið verði að uppbyggingunni.

„Fram kom hjá ráðherra í óundirbúnum fyrirspurnum á Alþingi á fimmtudag, að ráðuneytið ætti nú í viðræðum við sveitarfélög um hvernig staðið verði að uppbyggingunni, samkvæmt þeim samningum sem Ásmundur Einar Daðason gerði en hafði ekki tryggt fjármögnun fyrir,“ segir Heimir Már.

Í samtali við fréttastofu segist Stefán sjálfur hafa rætt við fulltrúa nokkurra sveitarfélaga sem komi allir af fjöllum.

„Það hefur enginn sem ég hefur talað við fengið nokkur símtöl eða skilaboð eða eitt eða neitt frá ráðuneytinu áður en að þessi ákvörðun var tekin. Sem er mjög sérstakt því þetta er samstarfsverkefni ríkis og sveitarfélaganna,“ segir hann.

Sigríður Júlía Brynleifsdóttir, bæjarstjóri Ísafjarðarbæjar, segist ekki hafa fengið neinar upplýsingar um að fjárheimildinni hafi verið frestað til næsta árs.

„Við höfum ekki fengið neitt formlegt um að þetta sé staðreynd,“ segir Sigríður.

„Allaveganna hef ég ekki fengið það. Ég hef verið í sambandi við skólastjóra menntaskólans hérna og síðast þegar ég vissi hefði henni verið tjáð að þetta var allt í vinnslu hjá ríkinu.“

Sigríður er afar ósátt með skort á upplýsingunum og hafi sjálf einungis frétt af breytingunum í umfjöllun fjölmiðla.

„Þessi óvissa er niður fyrir allar hellur og ég er mjög ósátt með það.“

Óvissa um styrk sem átti að nýta í verkefnið

„Ísafjarðarbær sótti um í fiskeldissjóð á síðasta ári og fékk þá úthlutun úr fiskeldissjóðs til að leggja í byggingu verknámshúss á Ísafirði,“ segir Sigríður.

„Það er líka hrikalegt fyrir okkur að sitja uppi með styrk fyrir verkefni sem er ekki að verða, þannig að það brennur inni.“

Samkvæmt samningnum áttu sveitarfélögin sjálf að sjá um fjörutíu prósent af fjármögnun verkefnisins.  Samningurinn við Ísafjarðarbæ, Bolungarvíkurkaupstað og Súðavíkurhrepps var undirritaður í apríl 2024. Áætlað er að bæta við allt að þúsund fermetrum við skólann og setja upp viðunandi aðstöðu fyrir nám í trésmíði, háriðngreinum og rafiðngreinum.

„Það er mjög mikil vöntun á því að bæta aðstöðuna og líka af því það er vilji til þess að auka framboð og getu skólans til þess að taka inn fleiri nemendur í verknám. Okkur vantar iðnaðarmenn. Það er vöntun hér eins og annars staðar á landinu,“ segir Sigríður.