Flutningur Konu­kots mikið fram­fara­skref en skilur á­hyggjur ná­granna

„Húsnæði okkar í Konukoti var komið til ára sinna, viðhaldsþörfin mikil og var ekki að halda þeim stöðlum sem við þurfum á að halda varðandi neyðarhúsnæði þannig við þurftum að horfa til nýs húsnæðis,“ segir Soffía Hjördís Ólafsdóttir, deildarstjóri málaflokks heimilislausra með miklar og flóknar þjónustuþarfir.

Hún segir unnið að því að standsetja nýja húsnæðið og það sé mikið fagnaðarefni að það sé verið að opna sex tímabundin húsnæðisúrræði fyrir konur sem hafi glímt við heimilisleysi. Það þurfi því að huga að ýmsu varðandi aðbúnað og öryggi áður en hægt er að flytja inn.

Leitin stóð yfir mánuðum saman og var fyrir um hálfu ári auglýst eftir nýju húsnæði.

„Við hefðum viljað sjá þetta ganga hraðar fyrir sig en það er erfitt að finna þessari starfsemi staðsetningu og húsnæði þannig að lokum var þetta húsnæði fyrir valinu.“

Mótmæltu flutningi í grenndarkynningu

Flutningurinn var svo kynntur í grenndarkynningu í febrúar og mars og samkvæmt fundargerð umhverfis- og skipulagsráðs Reykjavíkur bárust athugasemdir frá eiganda Smábitans, Sameind og lögfræðistofunni Lagarökum fyrir hönd fyrirtækisins Krosshólma. Öll mótmæla þau flutningi athvarfsins í Ármúla og lýsa yfir áhyggjum af umgengni, áreiti og mögulegri vímuefnaneyslu skjólstæðinga Konukots. Sameind og Krosshólmi reka bæði rannsóknarstofu í húsnæðinu við hlið en Smábitinn er veitingastaður. Í umsögn Sameindar er auk þess bent á að í næsta nágrenni, í Ármúla 28 til 30, er rekinn leikskóli. Það er leikskólinn Brákarborg.

Soffía segir aðstandendur Konukots sýna áhyggjum nýrra nágranna fullan skilning.

„Við sýnum því fullan stuðning að þegar að nærumhverfi, sama hvort það sé verslana eða íbúðarhúsnæði, breytist, þá hafi fólk spurningar og athugasemdir. Við viljum svara því og byggja upp traust. Við erum samt sem áður líka með öflugt viðbrögð þegar að eitthvað kemur upp á. Við treystum á gott samstarf við viðkomandi aðila og munum setja okkur í samband við þá þegar nær dregur opnun.“

Í nágrenni við Konukot þar sem það er rekið í Eskihlíð er að finna leikskóla, líkamsræktarstöð og auðvitað heimili fólks. Soffía segir núverandi samstarf við nágranna í Eskihlíð almennt gott.

„Þetta hafa verið frábærir nágranna í núverandi staðsetningu Konukots. Auðvitað hafa komið upp atvik sem við höfum þurft að bregðast við með tilheyrandi hætti en við leggjum mikið upp úr því að allir nágrannar hafi gott aðgengi að stjórnendum úrræðisins, en síðan bendum við fólki á ábendingavef borgarinnar,“ segir Soffía.

Það sé mikið lagt upp úr því að bregðast hratt og örugglega við athugasemdum. Þau vilji fleiri athugasemdir frekar en færri.

Auk þess að opna neyðarathvarf fyrir konur verður í húsnæðinu tímabundið húsnæðisúrræði með stuðningi fyrir konurnar sem þar dvelja allan sólarhringinn. Sami opnunartími verður í neyðarúrræðinu en starfsmaður í Konukoti allan sólarhringinn til að sinna þeim sem dvelja þar til lengri tíma. Hún segir lengi hafa verið kallað eftir slíku tímabundnu úrræði fyrir heimilislausar konur. Sjö konur hafi dvalið í Konukoti það sem af er ári með opnun sex nýrra húsnæðiseininga líti til bjartari tíma, þó vandinn sé stærri en það.

„Þetta er stórt framfaraskref fyrir borgina og fyrir konur, að við erum að opna sex ný húsnæðisúrræði fyrir konur. Það eykur framboð á húsnæði og það er grunnmarkmið okkar í Reykjavíkurborg að auka húsnæðisframboð og draga úr þörf á neyðarþjónustu og ég held að við í samfélaginu séum öll sammála um að það sé réttasta lausnin í þessu máli.“

Útsettar fyrir ofbeldi

Fjallað hefur verið um það í vikunni að tilkynningum hafi fjölgað um heimilisofbeldi. Soffía segir þetta einnig vandamál meðal heimilislausra kvenna.

„Ofbeldi þrífst mjög víða þar inni og þessi hópur er mjög útsettur fyrir ofbeldi. Þær þarfnast sérstakrar verndar og við vonumst til þess að með þessu húsnæði verði hægt að auka vernd þeirra. Við erum ekki með úrræði fyrir þolendur heimilisofbeldis sem glíma við heimilisleysi,“ segir hún og húsnæði sé algjört lykilatriði fyrir konur í þessari stöðu, sérstaklega þær sem eru jaðarsettar eins og sá hópur sem leitar til þeirra í Konukot.