Fékk af­sökunar­beiðni frá SNL eftir „ill­kvittinn og ófyndinn“ skets

SNL sýndi á laugardag sketsinn White Potus, grínútgáfu af þriðju seríu White Lotus, þar sem Trump-fjölskyldan var tekin fyrir.

Þarna mátti sjá vel girtan Donald Trump fá taugaáfall yfir áhrifum tollanna, óðamála Melaniu Trump og bræðurnar Don Jr. og Eric Trump. Þá brá Jon Hamm sér í hlutverk heilbrigðismálaráðherrans Robert F. Kennedy Jr. í líki Rick Hatchett (Walton Goggins) úr þriðju seríu þáttanna.

Sketsinn má sjá hér að neðan.

Í sketsinum spyr Kennedy: „Ég hef verið að fá þessar klikkuðu hugmyndir, eins og hvað ef við tökum allan flúorinn úr drykkjarvatninu? Hvað myndi það gera við tennur fólks?“

„Flúoríð? Hvað er það?“ svaraði eiginkona hans, leikin af Söruh Sherman, með risastórar gervitennur og enskan hreim. Þarna var greinilega ekki verið að gera grín að Cheryl Hines, alvöru eiginkonu Kennedy, heldur Aimee Lou Wood sem leikur sama karakter í White Lotus og er þekkt fyrir óhefðbundnar tennur sínar. Brandarinn stakk því í stúf við restina af sketsinum.

„Illkvittið og ófyndið“

Á laugardaginn deildi Aimee Lou Wood röð hringrása (e. story) á Instagram þar sem hún lýsti fyrir aðdáendum samskiptum sínum við fólkið hjá HBO sem hefði verið mjög stuðningsríkt í hennar garð. Í kölfarið ákvað hún að létta frekar af sér.

„En á meðan ég er í hreinskilnisham, þá fannst mér SNL-dæmið illkvitið og ófyndið,“ sagði hún á einni myndinni.

„Algjör skömm því ég skemmti mér konunglega þegar ég horfði fyrir nokkrum vikum síðan. Gerið endilega grín - um það snýst þátturinn. En það hlýtur að vera sniðugari, fíngerðari og ekki jafn ódýr leið að því?“ sagði hún í næstu hringrás.

Wood, sem er frá Stockport úr Manchester-sýslu, var ekki heldur sérlega ánægð með hreiminn. 

„Náið hreimnum að minnsta kosti réttum, í alvöru. Ég virði nákvæmni jafnvel þó hún sé illkvitin,“ sagði hún á annarri mynd.

Um tveimur tímum eftir fyrstu færsluna birti Wood færslu þar sem sagði: „Ég hef fengið afsökunarbeiðni frá SNL.“ 

Þáttastjórnendur virðast hafa beðið Wood persónulega afsökunar því afsökunarbeiðnin er ekki opinber. Að fólk sé beðið afsökunar af SNL þykir ansi sjaldséð og ef það er gert þá er það gjarnan gert í sjálfum þættinum á óhefðbundinn máta.

Að lokum birti Wood hringrás þar sem hún sagðist alveg hafa húmor fyrir sjálfri sér.

„Ég er ekki hörundsár. Ég elska í alvörunni að láta gera grín að mér þegar það er sniðugt og í góðri trú. En grínið var um flúor. Ég er gistennt en ekki með slæmar tennur,“ sagði hún.

Hún sagðist gera sér grein fyrir því að SNL gengi út á skopstælingar. Restin af sketsinum hafi fjallað um að kýla upp fyrir sig meðan þessi karakter var sá eini sem var kýldur niður. Hún tók sérstaklega fram að henni væri ekki illa við Sherman heldur bara sjálft konseptið.