Van Dijk tjáir sig um samninga­við­ræðurnar

Allt bendir til þess að Trent Alexander-Arnold yfirgefi Liverpool frítt þann 1. júlí og semji við spænska stórveldið Real Madrid. Van Dijk og Salah hafa einnig verið orðaður frá félaginu og mismikið heyrst af samningaviðræðum leikmannana.

Líkleg brottför Alexander-Arnold er sögð gefa Liverpool frekara frelsi í viðræðunum við hina tvo leikmennina og rými til að bjóða þeim betri samninga. Van Dijk hefur meðal annars verið orðaður við Frakklandsmeistara Paris Saint-Germain, sem og lið í Sádi-Arabíu.

Van Dijk segir samningaviðræðurnar við Liverpool vera á réttri leið. 

„Það eru framfarir, já,“ hefur James Pearce á The Athletic eftir van Dijk.

Spurður hvort það þýddi að hann yrði áfram hjá Liverpool sagði van Dijk: „Ég veit það ekki, við sjáum til. Það eru viðræður í gangi og þetta kemur í ljós,“

„Ég elska félagið, ég elska stuðningsmennina og þeir voru til staðar fyrir okkur aftur og við vildum verðlauna þá,“ sagði van Dijk.

Hollendingurinn sýndi fágæta slaka frammistöðu er Liverpool tapaði 3-2 fyrir Fulham í gær. Um var að ræða fyrsta tap liðsins í 26 deildarleikjum.

Liverpool er með ellefu stiga forystu á toppi deildarinnar þegar sjö umferðir eru eftir. Liverpool mætir West Ham United á Anfield næstu helgi.