„Búnir að missa of marga af þessum heimastrákum“

ÍBV er spáð 12. sæti Bestu deildar karla í spá íþróttadeildar Vísis og Stöðvar 2. Eyjamenn eru komnir aftur í efstu deild eftir að hafa unnið Lengjudeildina á síðasta tímabili.

„Ég verð að viðurkenna að ég er dálítið svartsýnn. Það eru því miður alltaf tvö lið sem þurfa að bíta í það súra epli að falla og miðað við mína spá og hvernig ég sé þetta spái ég því að þetta verði erfitt sumar fyrir þá,“ sagði Baldur.

En hvað er það helsta sem gæti komið Eyjamönnum til bjargar?

„Ef Láki [Þorlákur Árnason, þjálfari ÍBV] fær þennan leikmannahóp til að tikka, útlendingakaupin hitta í mark og það eru spennandi leikmenn þarna. Þeir eru samt búnir að missa of marga af þessum heimastrákum sem þeir hefðu viljað halda, sem hafa reynsluna úr efstu deild,“ sagði Baldur.

„En ég veit að markmiðið þeirra er að búa til stöðugt Bestu deildarlið. Þeir eru orðnir pínu þreyttir á jójó-inu. Það verður spennandi að sjá en miðað við hópinn og á hvaða stað þeir eru núna; þeir eru ekki búnir að spila á sínu besta liði neitt í vetur þannig þeir eru að safna í það og það er spurning hversu lengi þeir verða að ná takti. Ef það tekst gætu bjargað sér en ef þeim tekst það ekki verður þetta erfitt sumar.“

ÍBV sækir Víking heim í fyrsta leik sínum í Bestu deildinni mánudaginn 7. apríl.