Liv sakar Guð­jón um sögufölsun: „Það stappar nærri siðblindu ef hann trúir þessu sjálfur“

Guðjón Már fór yfir feril sinn í hlaðvarpsþættinum Íslenska drauminum og lýsti því þar hvernig hann tók að sér að stofna Nova fyrir Novator, fjárfestingarfélag Björgólfs Thors Björgólfssonar, árið 2004. Viðskiptablaðið fjallaði fyrst um málið.

„Nova var stofnað eftir að ég hitti á Bjögga og Novator menn á landsleik úti í Búlgaríu. Við pitch-um hugmyndinni að það væri hægt að setja upp 3G-fjarskiptanet mjög hratt með því að vinna með Orkuveitunni,“ segir Guðjón í þættinum.

Guðjón stofnaði Íslandssíma árið 1998 en seldi sig út úr félaginu eftir hrun á fjármálamörkuðum. Sameinað félag Íslandssíma og Tal varð að Og Vodafone í apríl 2003. Vodafone hafi sofnaði á verðinum um það leyti „sem varð til þess að það kom hvati að stofnun Nova,“ segir Guðjón.  

Hann lýsir því síðan hvernig hann byggði upp Nova í tvö ár áður en hann afhenti Novator félagið. Liv og Jóakim hafi þá tekið við keflinu og byggt upp fjarskiptafyrirtækið.

Ætlar ekki að sitja undir sögufölsun

Liv Bergþórsdóttir, sem var forstjóri Nova í ellefu ár frá stofnun til 2018, hefur birt færslu á LinkedIn til að bregðast við yfirlýsingum Guðjóns. Hún segir margt sem hann segir í viðtalinu kolrangt og sé hún tilneydd til að leiðrétta það.

„En það sem hann segir þarna opinberlega er sögufölsun og það stappar nærri siðblindu ef hann trúir þessu sjálfur. Undir þessu ætla ég ekki að sitja enda veit ég að félagar mínir í stofnun Nova, Joakim Reynisson og Björgólfur Thor og aðrir sem að uppbyggingunni komu taka undir með mér,“ segir hún í færslunni.

Novator hafi gert „nákvæmlega það sama á Íslandi og þeir voru þegar að gera í 3G fjarskiptum erlendis,“ segir hún í færslunni. Hún segir Jóakim hafa unnið hjá Novator á þessum tíma. 

„Guðjón Már kom ekki með hugmyndina að Nova, hann kom ekki að því að móta stefnu félagsins og hann skapaði ekki vörumerkið Nova. Þá kom hann heldur ekki að uppbyggingu félagsins né rekstri þess nema sem verktaki í gegnum félag sitt Industria,“ segir hún.

Vill ekki að boðið sé upp á sögufölsun

Áhugi Guðjóns á verkefninu hafi verið öllum ljós að sögn Livar en hugmyndir hans ekki fallið að áformum Novator. Því hafi hún og Jóakim verið ráðin í verkefnið. 

Hún segist hafa unnið viðskiptaáætlun félagsins og leitt uppbyggingu þess ásamt Jóakim, starfsmönnum Novator og öðru góðu fólki.

Guðjón Már hafi stofnað félagið Industria og Nova gert við hann þjónustusamning um uppsetningu fyrstu 3G-senda Nova. 

„Við áttum mjög gott samstarf við hann og félaga hans í Industria enda unnu þeir gott verk við að koma upp sendum félagsins. Guðjón hafði einnig mikinn áhuga á að vinna að efnisveitu fyrir Nova en ákvörðun var tekin um að fara aðrar leiðir,“ segir hún í færslunni.

„Saga Nova og uppbygging fyrirtækisins er flestum sem til þekkja vel kunn. Öðrum sem minna þekkja til vil ég ekki að sé boðið upp á svona sögufölsun,“ segir Liv.

Leitt að heyra fólk eigna sér afrek annarra

Margrét Tryggvadóttir, núverandi forstjóri Nova, deilir færslunni og segir Liv og Jóakim vera einstaka leiðtoga sem hafi alið Nova-liðið vel upp.

„Ég er þakklát fyrir að hafa fengið tækifæri að taka þátt í vegferð Nova og leitt að lesa þegar aðrir ætla að eigna sér afrek annarra,“ skrifar hún.

Fjöldi fólks hefur brugðist vel við færslu Livar, þar á meðal Magnús Hafliðason, framkvæmdastjóri N1; Guðrún Einarsdóttir, framkvæmdastjóri Rue de Net; Arndís Kristjánsdóttir, eigandi Krambers og Þórhallur Jóhannsson, fjármálastjóri Novaþ