Einn og einn Lite bjór ekki að fara að drepa þig

Þetta er meðal þess sem fram kom í Brennslunni á FM957 í morgun. Þar lögðu þeir Rikki G og Egill Ploder skýrsluna fyrir Gillz sem hefur verið einkaþjálfari og ráðlagt fólki í áraraðir um það hvernig hægt sé að koma sér í betra form. Egill segist meðal annars efins um að skynsamlegt sé að ráðleggja fólki að hætta alfarið áfengisneyslu, Íslendingar ættu að reyna að minnka hana.

Boð og bönn fari öfugt ofan í fólk

„Mér finnst ekki virka mjög vel að banna fólki hluti. Maður hefði frekar viljað sjá þarna að það væri mælt með að fólk skrúfi kannski aðeins niður. Ef þú ert að æfa, borða hollt og hreyfir þig þá er einn og einn Lite bjór eða rauðvínsglas ekki að fara að drepa þig.“

Gillz segir boð og bönn oft fara öfugt ofan í fólk. Áfengi sé augljóslega ekki hollt. Það þurfi að skrúfa neysluna niður en fólk þurfi líka að hafa gaman og segist Egill frekar hafa viljað sjá þær ráðleggingar í skýrslu Landlæknis.

Borðum of mikið af brauði

„Það eru allir sammála um að minnka unnið kjöt en þú setur það ekki í sömu nærbuxur og þegar þú ferð í lambalæri til mömmu. Það er ótrúlegt að við séum ennþá að díla við þetta. Taktu fram unnið kjöt, rautt unnið kjöt. Landlæknir er væntanlega ekki að halda því fram að íslenskt lambakjöt sé óhollt. Hreint íslenskt lambakjöt er ekki það sama og pepperóní.“

Hann segir ástæðu þess að Íslendingar séu feitasta þjóð Evrópu einfaldlega vera þá að við borðum of mikið af pizzu, pasta og brauði. Þetta hefur Egill séð í þau fleiri en tuttugu ár sem hann hefur starfað við að koma fólki í stand og skoðað mataræði skjólstæðinga sinna.

„Það eina sem fólk borðar það er brauð, í nánast öll mál og pizza, pasta brauð, fólk er með þetta í æð.Þannig ef að brauðið myndi fara niður og rauða kjötið upp þá væru Íslendingar í töluvert betra standi.“

Þannig fari fólk í hitting, þar sé brauð á boðstólum. Það hoppi inn í sjoppu, brauð. Fari út að borða, brauðkarfa. Þetta sé einfaldlega út um allt. Hann segist ekki myndu mæla með því að fólk hætti alfarið að borða brauð, vandamálið sé einfaldlega að Íslendingar hrúgi því í sig.

„Ég myndi aldrei kippa því af þér. Því um leið og ég myndi segja: Heyrðu, áfengi og brauð það er farið þá bara hrúgarðu því í þig.“

Sjálfur með skotheld ráð að heilbrigðari lífsstíl

Egill tekur fram í Brennslunni að það sé margt jákvætt í skýrslunni, hún sé heilt yfir góð. Mælt sé með fiskáti tvisvar í viku, að borðaðir séu fleiri ávextir og mælt með því að Íslendingar taki meira D-vítamín. Það eina sem allir séu sammála um í skýrslunni sé að við séum að borða of mikið af sykri og unnu drasli.

„Þannig það er margt mjög jákvætt í þessari skýrslu. Það er bara þreytt að taka ekki meira fram um unnið rautt kjöt og mjólkurvörurnar. Það er verið að mæla með því að þamba mjólk þarna, en af hverju, hvernig? Hleðsla, skyr og grískt jógúrt í millimál er ekki það sama og að þamba Nýmjólk.“

Egill veltir því upp í léttum tóni í Brennslunni að hann ætti kannski sjálfur að gefa út skýrslu með eigin ráðleggingum á nokkurra ára fresti. Ráðleggingum Gillza.

„Það eru nokkrir hlutir sem ég myndi láta koma fram. Consistency í æfingum, ekkert sem toppar það. Íslendingurinn tekur kannski nokkrar vikur, dettur út í þrjá mánuði og byrjar aftur. Consistency. Minnka unnið drasl eins og við ræddum áðan, allir sammála því. Skrúfa próteininntökuna vel upp, lyfta lóðum í bland við cardio. Fyrr upp í rúm eins og Gillz, 21:30. Gufa þrisvar í viku og einn svindldagur í viku. Ef þú fylgir þessum ráðleggingum þá ertu í helvíti góðum málum.“