Segir föður sinn hafa verið við hesta­heilsu

Þetta kemur fram í umfjöllun Daily Mail þar sem rætt er við Leslie. Líkt og fram hefur komið fannst Gene Hackmann látinn á heimili sínu í Santa Fe í Nýju-Mexíkó ásamt eiginkonu sinni píanóleikaranum Betsy Arakawa.

Lögregla hefur ekki gefið upp hvernig þau létust. Hún hafði áður gefið út að ekki væri talið að andlát þeirra hefði borið að með glæpsamlegum hætti en síðar í gær kom fram að dauði þeirra væri talinn nægilega grunsamlegur til þess að rannsaka þyrfti málið betur.

„Þrátt fyrir aldur hans var hann í afar góðu líkamlegu ásigukomulagi,“ segir Leslie um 95 ára gamlan föður sinn heitinn. „Hann var hrifinn af pílates og jóga og gerði þær æfingar nokkrum sinnum í viku. Þannig hann var við góða heilsu.“

Sökum aldur hans segist Leslie ekki vera í þannig áfalli yfir andláti föður hennar. Eiginkona hans Arakawa var hinsvegar ekki nema 63 ára gömul. Leslie segist ekki hafa vitað af neinu undarlegu í gangi í lífi föður síns, þau hafi verið afar náin þó þau hafi ekki sést um nokkurra mánaða skeið þar sem hún býr í Kaliforníu. Hún segir hann hafa verið farinn að kljást við minnisglöp.

Áður hefur komið fram að lögregla telji að hjónin hafi verið dáin í einhvern tíma þegar lík þeirra fundust. Útidyr hússins hafi verið opnar en allar aðrar dyr læstar. Ekkert bendi til þess að brotist hafi verið inn. Einn lifandi hundur þeirra hjóna hafi verið fyrir utan húsið, en tveir inni á baðherbergi þar sem Arakawa fannst látin. Annar þeirra var dauður.

Fram hefur komið að opið pilluglas hafi legið á gólfinu nærri Arakawa. Hackman fannst látinn inni í þvottaherbergi þeirra hjóna og telur lögregla hann hafa fallið í jörðu þar sem sólgleraugu og stafur hafi fundist við hlið hans. Engin ummerki um sár eru á líkum þeirra. 

Lögregla segir að athugað hafi verið hvort að gasleki hafi orðið á heimili hjónanna og dregið þau til dauða. Engin ummerki um slíkan leka hafa fundist.