Innlent

Þurfi að leggja meira í skóla án að­greiningar svo stefnan virki

Lovísa Arnardóttir og Margrét Helga Erlingsdóttir skrifa
Ásthildur Lóa segir stefnu um skóla aðgreiningar fallega og góða en mögulega hafi ekki nægilega mikið verið lagt í hana svo hún gangi eins og hún eigi að gera.
Ásthildur Lóa segir stefnu um skóla aðgreiningar fallega og góða en mögulega hafi ekki nægilega mikið verið lagt í hana svo hún gangi eins og hún eigi að gera. Vísir/Vilhelm

Ásthildur Lóa Þórsdóttir, barna- og menntamálaráðherra, segir áríðandi að þegar erfið mál komi upp innan skóla sé strax tekið á þeim. Töluvert hefur verið fjallað um erfiða stöðu innan Breiðholtsskóla undanfarið. Faðir stúlku í 7. bekk steig nýverið fram og lýsti ofbeldismenningu innan skólans.

Síðar tóku starfsmenn skólans undir og lýstu miklu úrræðaleysi. Skóla- og frístundasvið Reykjavíkur segir að verið sé að bregðast við málinu.

Sjá einnig: „Það er ekki rasismi að benda á augljóst vandamál“

Um árabil hefur skólakerfið verið rekið eftir stefnunni skóli án aðgreiningar þar sem pláss á að vera fyrir alla innan skólanna. Þegar erfið mál koma upp er þó oft vísað til stefnunnar og úrræðaleysis innan skólakerfisins. Ásthildur Lóa segir stefnuna fallega og það sé gott að vinna eftir henni en það þurfi meira til að hún virki. Hún segir eitt erfitt mál þó alls ekki núlla stefnuna út. 

„Ef það á að reka skóla án aðgreiningar eins og hugsjónin talar um, eins og hugmyndafræðin talar um, þá þarf leggja miklu meira inn í skólana. Sérstaklega fleiri kennara, fleiri úrræði fyrir börn sem eru með allskyns vanda og þess háttar. Og það hefur kannski ekki verið gert nógu vel.“

Kennarar lýsa margir erfiðu ástandi innan skólanna. Þau séu að glíma við vandamál sem komu kennslu ekki við á neinn hátt.

Sjá einnig: Börnin líði fyrir „á meðan stjórn­völd fljóta sofandi að feigðar­ósi“

„Það eru gríðarlega mörg mál sem koma inn í skólana og þegar þú ert með bekk þar sem kannski eru töluð fjögur fimm tungumál og sumir tala ekki, svo ertu með greiningar, þá verður þessi staða gríðarlega þung fyrir kennara og í sumum tilfellum bara næstum því vonlaus að eiga við.“

Hún segir þurfa meiri skilning frá skólayfirvöldum hvað sé gangi innan skólastofanna, og skólar þurfi fleiri tæki til að takast á við það. Hún segir það þó ekki á ábyrgð ráðuneytisins.

„Nú eru grunnskólarnir reknir af sveitarfélögunum þannig það er ekki með beinum hætti sem menntamálaráðuneytið kemur að því.“

Skóla- og menntamál Grunnskólar Ríkisstjórn Kristrúnar Frostadóttur Reykjavík Börn og uppeldi

Tengdar fréttir

Segir búið að teikna upp aðgerðir og boðar til aukafundar

Boðað hefur verið til aukafundar í skóla- og frístundaráði Reykjavíkur á morgun til að ræða stöðuna í Breiðholtsskóla. Staða skólans er eina málið sem er á dagskrá fundarins. Steinn Jóhannsson sviðsstjóri hjá skóla- og frístundsviði segir unnið að því að bregðast við svo börn séu örugg í skólanum og foreldrum líði vel með að senda börnin í skólann.

Þingmanni blöskrar viðbragðsleysi skólastjóra

Jón Pétur Zimsen, fyrrverandi skólastjóri og núverandi alþingismaður Sjálfstæðisflokksins, gagnrýnir harðlega viðbrögð stjórnvalda og skólayfirvalda við alvarlegum agavanda í Breiðholtsskóla. Hann segir það óboðlegt að ofbeldismenningu hafi verið leyft að grassera þar árum saman án raunverulegra úrbóta.

Borgin hafi ekki brugðist nógu hratt við í Breiðholtsskóla

Steinn Jóhannsson, sviðsstjóri skóla- og frístundasviðs Reykjavíkurborgar, segir fjölda aðgerða til skoðunar til að bregðast við því ástandi sem uppi er komið í Breiðholtsskóla en þar lýsa foreldrar því að börn þeirra þori ekki að mæta í skólann af ótta við fámennan hóp drengja sem halda árangi í heljargreipum.

Mest lesið


Fleiri fréttir

Sjá meira


×

Mest lesið