Martínez með slitið kross­band

Martínez varð fyrir meiðslum í 2-0 tapi Man United á heimavelli gegn Crystal Palace. Strax var ljóst að meiðslin væru alvarleg en Martínez bað samstundis um skiptingu og hélt um hné sitt. Hann var í kjölfarið borinn af velli.

Eftir leik sagði Rúben Amorim, þjálfari liðsins, að um væri að ræða alvarleg meiðsli. Nú greinir The Sun, ásamt fleiri miðlum, frá því að Martínez hafi slitið krossband í hné.

Hinn 27 ára gamli Martínez fylgdi Erik ten Hag til Manchester frá Ajax. Eftir erfiða byrjun sýndi Martínez sínar bestu hlíðar á sinni fyrstu leiktíð í ensku úrvalsdeildinni. Undir lok leiktíðar varð hann hins vegar fyrir meiðslum á rist sem eltu hann inn í aðra leiktíð sína hjá félaginu.

Eftir nokkra leiki meiddist hann aftur á fæti þar sem hann hafði farið alltof snemma af stað eftir meiðslin á fyrstu leiktíð sinni í Manchester. Hann var frá keppni þangað til í janúar á síðasta ári þegar hann sneri til baka en náði aðeins þremur leikjum áður en hann meiddist illa á hné.

Hann var meiddur þangað til í lok mars þegar hann kom inn af bekknum gegn Brentford. Það gaman entist þó stutt þar sem Martínez varð fyrir meiðslum á kálfa í leiknum og var frá keppni allt þangað til undir loka tímabils. Hann náði síðustu deildarleikjum liðsins sem og þegar það vann Manchester City í úrslitum ensku bikarkeppninnar.

Martínez hefur verið mikilvægur í annars slöku liði Man United það sem af er leiktíð. Þá hafði hann fundið markaskóna sína og verður erfitt fyrir Amorim að fylla skarð hans í öftustu línu, bæði er kemur að varnarleik sem og uppspili.

Martínez hefur spilað 91 leik fyrir Manchester United til þessa.