Nærri helmingur segir Dan­mörku standa ógn af Banda­ríkjunum

Þetta kemur fram í nýrri YouGov könnun sem breska blaðið Guardian fjallar um í dag. 

Mikil spenna hefur verið á milli ríkjanna undanfarnar vikur eftir að Donald Trump forseti Bandaríkjanna fór æ oftar að minnast á möguleikann á því að Bandaríkjamenn taki yfir Grænland. 

Könnuin var gerð í síðustu viku og voru rúmlega þúsund Danir spurðir út í þetta mál. 

46 prósent þjóðarinnar eru á því að brölt Bandaríkjanna sé nokkuð alvarleg eða mjög alvarleg ógn við fullveldi Danmerkur. 

Einnig var spurt út í ógnina frá öðrum löndum og telja Danir að þeim stafi meiri ógn af Bandaríkjunum heldur en af löndum á borð við Íran og Norður-Kóreu. 

Ógnin sem Dönum finnst stafa frá Rússlandi er þó miklum mun meiri, en 86 prósent aðspurðra sögðu að Rússland ógni Danmörku nokkuð eða mjög mikið.