Flokkur fólksins leitar að upp­lýsinga­full­trúa

Starfsauglýsinguna má finna á vefsíðunni alfred.is.

Þar segir að starfið feli í sér kynningu á starfsemi flokksins, fjölmiðlasamskipti, greina- og ræðuskrif, og skipulagningu viðburða og ferðalaga þingmanna.

Þá segir um flokkinn:

„Stjórnmálaflokkurinn Flokkur fólksins var stofnaður árið 2016 ... hugmyndafræði flokksins felst fyrst og fremst í félagshyggju, svo sem bættum velferðarmálum og auknum stuðningi við þá sem standa höllum fæti í samfélaginu.“

Menntunar- og hæfniskröfur eru eftirfarandi:

• Menntun og reynsla sem nýtist í starfi.
• Starfsreynsla þar sem reynt hefur á textaskrif, ritstjórn, yfirlestur og miðlun efnis.
• Reynsla af fjölmiðlastörfum eða samskiptum við fjölmiðla er kostur.
• Þekking og reynsla af uppsetningu efnis á myndrænan hátt er kostur.
• Þekking og reynsla af forritum eins og Canva eða Photoshop er kostur.
• Þekking og reynsla á sviði opinberrar stjórnsýslu er kostur
• Reynsla af notkun vefumsjónarkerfa líkt og wordpress er kostur.
• Reynsla af gerð fréttabréfa og notkun forrita líkt og mailchimp er kostur.
• Metnaður og vilji til að ná árangri.
• Skipulagsfærni, frumkvæði, sjálfstæði í vinnubrögðum, sveigjanleiki og geta til að vinna undir álagi.
• Gott vald á íslensku og ensku og færni til að tjá sig í ræðu og riti.

Gengið hefur á ýmsu hjá Flokki fólksins undanfarna daga, en í síðustu viku var greint frá því að flokkurinn uppfylli ekki skilyrði fyrir úthlutun fjárstyrkja til stjórnmálaflokka, en hefði samt sem áður þegið 240 milljónir króna úr ríkissjóði.

Þá var greint frá því í gær að Inga Sæland hefði hringt í skólastjóra Borgarholtsskóla og minnt hann á ítök hennar í lögreglunni, þegar hún hellti sér yfir hann vegna týnds skópars barnabarns hennar.

Sjá einnig: Ráðherra hringdi í skólastjóra vegna týnds skópars