Viss um sigurinn en ó­viss um að komast inn á lands­fundinn

Þórdís Kolbrún R. Gylfadóttir, varaformaður Sjálfstæðisflokksins, tilkynnti í dag að hún myndi hvorki sækjast eftir formannsstólnum né öðru embætti í forystu flokksins. 

Enginn hefur formlega lýst yfir framboði til embættis formanns, nema Snorri. Það gerði hann fyrr í þessum mánuði, og sagðist hafa fengið hvatningu til þess í draumi þar sem Ólafur Thors, Margaret Thatcher og Bjarni Benediktsson, fráfarandi formaður, komu við sögu. 

Snorri setti sig í samband við Vísi fyrr í dag vegna umfjöllunar um þögnina sem virðist ríkja um möguleg framboð. Þar vildi Snorri minna á að þegar væri kominn einn frambjóðandi, enginn annar en hann sjálfur. 

Ólíklegur, enda ólíkindatól

Í samtali við fréttastofu viðurkennir Snorri að hann sé mögulega ekki líklegastur til að hreppa hnossið, þrátt fyrir að vera einn í framboði, enn sem komið er.

„Kannski er ég ekki líklegur enda oft kallaður ólíkindatól, en ég er sigurviss og fullviss um að ég sé að taka við flokknum og heila hann og betrumbæta.“

Þetta er ekki í fyrsta sinn sem Snorri býður sig fram til forystu í flokknum, en það gerði hann einnig árið 2009. 

Hann segist alltaf hafa talið sig flokksbundinn Sjálfstæðisflokknum, þar sem hann hafi í gegnum tíðina fengið póst frá flokknum. Hann hafi hins vegar uppgötvað fyrir nokkrum dögum að svo væri ekki, þegar hann hafi ákveðið að prófa að skrá sig í flokkinn á netinu. 

„Það er leiðrétt og ég flokksbundinn í dag og get því tekið við formannssætinu á aðalfundinum.“

Rær að því öllum árum að fá sæti í höllinni

Aðspurður sagðist Snorri reyndar ekki vera með sæti á landsfundinum, en hann þarf að eiga sæti á fundinum til þess að teljast kjörgengur í forystu flokksins. Fundurinn fer fram dagana 28. febrúar til 2. mars næstkomandi í Laugardalshöll. Formannskjörið fer fram á síðasta degi fundarins, sunnudegi.

Sjá einnig: Ærandi þögn og klukkan tifar

„Ég er að vinna í því að fá sæti á aðalfundinum og hef sótt um það og ætti ekki að vera vandamál í lýðræðislegum flokki sem Sjálfstæðisflokki. Einhverjum kann að stafa ógn af mér, en þá væri bara um fordóma að ræða. Því ég æðrulaus maður og kem til dyranna eins og ég er klæddur,“ segir Snorri. 

Sjálfstæðisflokkurinn þurfi að hans mati á breytingum og uppfærslu að halda. Gamla fólkið og gömlu úreltu gildin verði að stíga til hliðar og treysta næstu kynslóðum.

„Bjarni var frábær stjórnmálamaður og fínasti náungi með góðan tónlistarsmekk og nú hefur hann boðið mér formannssætið sem ég þigg með þökkum.“