For­eldrar barna á Brákarborg lang­þreyttir á fáliðun og reglu­legum lokunum

Foreldrarnir segja tíða fáliðun í leikskólanum og loka þurfu heilum og hálfum deildum reglulega. Þá séu flutningarnir farnir að hafa mikil áhrif á bæði starfsmenn og börn. Þau krefjast úrbóta og skýringa frá borginni um það hvernig eigi að koma til móts við þau til að koma í veg fyrir frekari fáliðun og skerðingu á starfi. 

Undir greinina skrifa þau Valentina Tinganelli, Eyjólfur Sigurjónsson, Elísabet Erlendsdóttir, Sigrún Torfadóttir, Daniel Karlsson, Særún Ósk Böðvarsdóttir, Anna Margrét Arthúrsdóttir og Una Guðmundsdóttir.

„Leikskólinn Brákarborg hefur verið mikið í fréttunum undanfarið, því miður ekki af góðu. Fyrirferðamestar hafa verið fréttir af nýju húsnæði skólans sem flutt var í um miðjan ágúst 2022. Síðastliðið sumar, rétt fyrir opnun eftir sumarlokun, komu í ljós verulegir hönnunar- og burðarþolsgallar á nýja fallega húsnæðinu sem urðu þess valdandi að flytja þurfti alla starfsemina á nýja staði,“ segir í grein foreldranna.

Starfseminni var svo, eins og fjallað hefur verið um, komið fyrir á tveimur stöðum. Annars vegar í gömlu Brákarborg í Brákarsundi og hins vegar í skrifstofuhúsnæði í Ármúlanum. Í greininni kemur fram að til þess að bregðast við álagi sem þessum flutningum myndi fylgja hafi borginni tilkynnt foreldrum í haust að fjölga ætti stöðugildum í leikskólanum um tvö. Ekki hefur þó enn tekist að manna þær stöður samkvæmt grein foreldranna. 

Þá segja foreldrarnir mikið hafa gengið á í vetur. Það séu alls tólf starfsmenn í langtíma veikindaleyfi sem valdi mikilli skerðingu á leikskólastarfi. Ítrekað hafi þurft að loka deildum í heila eða hálfa daga eða taka upp fáliðun.

„Frá því að skólastarf hófst að nýju eftir sumarleyfi 2024 þann 12. ágúst og til áramóta hafa foreldrar og forráðafólk fengið 13 ólíka tölvupósta þar sem tilkynnt er um fáliðun, að sækja þurfi börnin á hádegi eða að tiltekin deild sé lokuð allan daginn. Þá voru teknar upp skipulagðar lokanir á hádegi sjö föstudaga þar sem ekki var hægt að manna leikskólann. Uppsafnað eru þetta 19 skipti þar sem er lokað heilan eða hálfan dag. Þar á undan, frá upphafi árs 2024 og til sumarleyfis, voru í heildina 21 skipti þar sem lokað var allan daginn, skipt var á milli deilda og þrisvar sinnum þurfti að sækja börnin fyrr utan þessi skipti,“ segir í greininni.

Sex fáliðunarpóstar á árinu

Þá kemur fram að á þeim tíu dögum sem leikskólinn hefur verið opinn á þessu ári hafi verið sendir út sex fáliðunarpóstar og tilkynnt að tilteknar deildir séu lokaðar frá hádegi eða allan daginn.

Sjá einnig: Færa börnin eftir að skemmdir í leik­skólanum komu í ljós

Í greininni segir að hópur foreldra hafi lýst óánægju sinni með því að senda póst á skóla- og frístundasvið Reykjavíkurborgar. Þar hafi þau óskað eftir svörum og viðbrögðum.

„Svar fagstjóra barst mánudaginn 13. janúar og er því lýst þar að borgin sé meðvituð um ástandið á Brákarborg. Jafnframt segir þar að Skóla- og frístundasvið sjái ekki fyrir endann á þessum vanda og að ekki sé til einföld lausn við honum. Í svarinu kemur fram að setja eigi saman teymi frá Skóla- og frístundasviði þar sem áætlað er að búa til aðgerðaráætlun vegna ástandsins á Brákarborg fyrir næstu vikur og mánuði.“

Foreldrarnir ítreka að vandinn sé ekki nýr. Það hafi verið ítrekað gripið til fáliðunar allt frá haustinu 2023 og skóla- og frístundasvið ætti að vera meðvitað um það. Þau sætti sig því ekki við þessi svör og vilji fá að vita hvernig eigi að koma til móts við þau og hvernig þeir fjármunir sem hafa verið sparaðir við að reka ófullmannaðan leikskóla verði nýttir.

Starfsfólk sé að bugast

„Við óttumst að það kraftmikla starfsfólk sem enn er í skólanum sé að bugast undan því álagi sem þau starfa við. Yfirstjórn leikskólahluta borgarinnar virðist þó vera algjörlega um megn að takast á við vanda leikskólans og virðist helsta lausnin sem þau bjóða er að bíða og vona að málin leysist með tímanum.“

Sjá einnig: „Al­vöru út­tekt“ verði gerð á máli Brákarborgar

Þau segja það hafa stungið í stúf að sjá svo í vikunni að það eigi að byggja nýjan leikskóla í Elliðaárdal og við leikskólann í Ármúla.

„Leikskólinn er fyrsta skólastigið og var til þess stofnað af ríkum ástæðum. Börn og foreldrar þurfa á þessari grunnþjónustu að halda, jafnvel þó að hún sé ekki lögbundin. Reykjavíkurborg segist vera fjölskylduvæn borg en við sem eigum börn í leikskólanum Brákarborg höfum ekki séð það í verki. Börnin okkar hafa búið við rótleysi og óstöðugleika í allt of langan tíma,“ segja þau að lokum og hvetja borgaryfirvöld til að sýna vilja sinn í verki.