Dönsku stelpurnar tryggðu sér úr­slita­leik á móti Hollandi

Þetta varð ljóst eftir að dönsku stelpurnar unnu sjö marka sigur á Slóveníu í kvöld, 33-26.

Holland vann Sviss fyrr í kvöld og liðin eru því jöfn í öðru og þriðja sæti með sex stig. Noregur er efst með átta stig og búið að tryggja sér sigur í milliriðlinum og sæti í undanúrslitunum.

Slóvenía stóð í þeim dönsku og var tveimur mörkum yfir í fyrri hálfleiknum en danska liðið endaði hálfleikinn með 5-1 spretti sem skilaði liðinu 17-15 forystu í hálfleik.

Danska liðið komst þremur mörkum yfir í upphafi seinni hálfleiks en þær slóvensku gáfu sig ekki. Dönsku stelpurnar voru sterkari undir lokin og unnu nokkuð öruggan sigur.

Elma Halilcevic skoraði sex mörk fyrir Dani og Andrea Aagot Hansen var með fimm mörk.